کشمیر اقوام متحدہ کے ایجنڈے پر موجود سب سے پرانے تنازعات میں سے ایک ہے، حریت کانفرنس

?️ 15 دسمبر 2023

سرینگر: (سچ خبریں) بھارت کے غیر قانونی زیر قبضہ جموں وکشمیر میں کل جماعتی حریت کانفرنس نے کہا ہے کہ کشمیر اقوام متحدہ کے ایجنڈے پر موجود سب سے پرانے تنازعات میں سے ایک ہے جس کا اب تک حل نہ ہونابڑے پیمانے پر انسانی جانوں کے اتلاف کا باعث ہے۔کل جماعتی حریت کانفرنس نے کشمیریوں سے بھرپوراظہار یکجہتی اور آزاد جموں وکشمیر قانون ساز اسمبلی کے اجلاس سے خطاب میں کشمیریوں کے جذ بات کی بھر پور ترجمانی پر پر وزیراعظم کا شکریہ ادا کیا۔

کشمیر میڈ یا سروس کے مطابق کل جماعتی حریت کانفرنس کے ترجمان نے سرینگر میں جاری ایک بیان میں کہا کہ کشمیری اقوام متحدہ کی طرف سے تسلیم شدہ حق ، حق خود ارادیت کیلئے گزشتہ سات دہائیوں سے بیش بہا قربانیاں دے رہے ہیں ۔ انہوںنے کہا کہ بھارت کشمیریوں کے جذبہ آزادی کو دبانے اور جموں وکشمیر پر اپنا غیر قانونی قبضہ برقرار رکھنے کیلئے تمام وحشیانہ ہتھکنڈے استعمال کر رہا ہے ۔

ترجمان نے کہا کہ نریندر مودی کی زیر قیادت بھارتیہ جنتا پارٹی کی ہندو توا بھارتی حکومت نے مقبوضہ علاقے میں ریاستی دہشت گردی کی تمام حدیں پار کر دی ہیں۔ انہوںنے بھارتی فورسز کی طرف سے مقبوضہ علاقے کے اطراف و اکناف میں جاری وحشیانہ مظالم کی شدید مذمت کرتے ہوئے کہا کہ تنازعہ کشمیر کے حل میں بنیادی رکاوٹ بھارتی ہٹ دھرمی ہے۔۔
کل جماعتی حریت کانفرنس کے ترجمان نے کہا کہ بھارت کی تمام تر چیرہ دستیوں اور اوچھے ہتھکنڈوں کے باوجود کشمیریوں کے حوصلے بلند ہیں اور وہ اپنے عظیم شہداءکے مشن کو اسکے منطقی انجام تک پہنچانے کیلئے پرعزم ہیں۔
انہوں نے عالمی برادری سے اپیل کی کہ وہ مسئلہ کشمیر کو کشمیریوں کی خواہشات اور اقوام متحدہ کی متعلقہ قراردادوں کے مطابق حل کرانے کے لیے بھارت پر دباؤ ڈالے۔