حریت کانفرنس نے فلسطین میں ہونے والی اسرائیلی دہشت گردی کی شدید مذمت کردی

?️ 13 مئی 2021

سرینگر (سچ خبریں) اسرائیل کی جانب سے فلسطینیوں کے خلاف ظلم و بربریت جاری ہے لیکن عالمی طاقتیں مظلوم فلسطینیوں کی حمایت کرنے کے بجائے غاصب اسرائیل کی حمایت کررہی ہیں لیکن اسی دوران خود بھارتی مظالم کا نشانہ بننے والے کشمیریوں کی جانب سے فلسطینیوں کی مکمل حمایت جاری ہے اور اب مقبوضہ کشمیر میں حریت کانفرنس نے اسرائیلی دہشت گردی کی شدید الفاظ میں مذمت کرتے ہوئے اسلامی تعاون تنظیم سے مطالبہ کیا ہے کہ وہ مسئلہ کشمیر اور فلسطین کو حل کرانے میں اپنا کردار ادا کرے۔

تفصیلات کے مطابق مقبوضہ کشمیر میں کل جماعتی حریت کانفرنس کے ورکنگ وائس چیئرمین غلام احمد گلزار نے کشمیر اور فلسطین کے مقبوضہ علاقوں میں بھارت اور اسرائیل کی طرف سے جاری قتل و غارت میں اضافے پر گہری تشویش کا اظہار کرتے ہوئے ان مظالم کی شدید مذمت کی ہے۔

کشمیرمیڈیاسروس کے مطابق غلام احمد گلزار نے سرینگر میں جاری ایک بیان میں کہا کہ جب امت مسلمہ عیدالفطر کا تہوار منانے کی تیاری کر رہی ہے، مظلوم کشمیری اور فلسطینی اپنے بنیادی حقوق کی بحالی کے مطالبے پر شہید کئے گئے اپنے عزیزوں کی لاشوں کو قبرستانوں میں دفن کررہے ہیں۔

انہوں نے اسلامی تعاون تنظیم پر زور دیا کہ وہ متحد ہوکر اٹھ کھڑی ہو اور کشمیر اور فلسطین کے تنازعات کے حل کو یقینی بنانے سمیت آنے والے چیلنجز کا مقابلہ کرے۔

غلام احمد گلزار نے بھارت اور مقبوضہ جموں و کشمیر کی جیلوں میں نظربند درجنوں حریت رہنماؤں اور کارکنوں کی بگڑتی ہوئی صحت پر تشویش کا اظہار کرتے ہوئے اقوام متحدہ اور انسانی حقوق کی تنظیموں پر زور دیا کہ وہ غیرقانونی طور پر نظربند کشمیری رہنماؤں کی جانیں بچانے کی خاطر ان کی رہائی کے لئے بھارت پر دباؤ ڈالیں۔

دریں اثناء قابض حکام کی طرف سے جاری کئے گئے ایک بیان میں کہا گیا ہے کہ مقبوضہ علاقے میں اس وقت کم از کم 23 قیدی کورونا وائرس کا شکار جبکہ 219 جیلوں میں قرنطینہ میں ہیں۔