حریت کانفرنس کی مقبوضہ کشمیر میں بھارتی سازش کے تحت علاقے کی بگڑتی ہوئی صورتحال پر شدید تشویش

?️ 18 جون 2021

سرینگر (سچ خبریں) مقبوضہ کشمیر میں کل جماعتی حریت کانفرنس نے بھارتی سازش کے تحت علاقے کی بگڑتی ہوئی صورتحال پر شدید تشویش کا اظہار کرتے ہوئے کہا ہے کہ بھارتی حکومت مقبوضہ کشمیر میں کشمیری عوام کو معاشی طور پر تباہ برباد کرنا چاہتی ہے۔

تفصیلات کے مطابق مقبوضہ کشمیر میں کل جماعتی حریت کانفرنس کے جموں خطے کے صدر میر شاہد سلیم نے مقبوضہ علاقے کی بگڑتی ہوئی سیاسی، سماجی و اقتصادی صورتحال پر شدید تشویش کا اظہار کیا ہے۔

کشمیر میڈیا سروس کے مطابق میر شاہد سلیم نے جموں سے جاری ایک بیان میں کہا کہ نریندر مودی کی فسطائی بھارتی حکومت کے مذموم منصوبے مقبوضہ علاقے کے مختلف مذاہب، خطوں اور برادریوں کے لوگوں کے سامنے بے نقاب ہوچکے ہیں۔

انہوں نے کشمیریوں کی مرضی کے خلاف متنازعہ علاقے کے حصے بخرے کرنے، مزاحمتی قیادت کو سیاسی سرگرمیوں اور حقوق سے محروم کرنے، معاشرتی اقدار کی سیاس منافرت کی بنیاد پر کھلواڑ اور کورونا کی آڑ میں سخت کرفیو اور لاک ڈائون کے ذریعے معیشت کو برباد کرنے کی شدید مذمت کی۔

میر شاہد سلیم نے کہا کہ من گھڑٹ افواہوں کے ذریعے روز مختلف مذاہب، خطوں اور برادریوں کے درمیان دوریاں پیدا کرنے کی پوری کوشش کی جا رہی ہے۔

انہوں نے آزادی پسند کشمیری عوام پر زور دیا کہ وہ بھارت کے مذموم منصوبوں سے ہوشیار رہیں اور بھارتی نوآبادیاتی حربوں اور جموں و کشمیر پر اس کے غیر قانونی قبضے کے خلاف متحدہ رہیں۔

کل جماعتی حریت کانفرنس کے رہنما نے سوپور اور سرینگر میں بے گناہ کشمیریوں کے حالیہ قتل کی مذمت کرتے ہوئے کہا کہ بھارتی فورسز اہلکار مقبوضہ علاقے کی شہری آبادی پر اس طرح گولیاں برسا رہے ہیں جیسے وہ یہاں شکار کی مہم پر ہیں۔

انہوں نے اقوام متحدہ کے سیکرٹری جنرل انتونیو گوتریس پر زور دیا کہ وہ مقبوضہ علاقے میں پیش آنے والے دلخراش واقعات کا نوٹس لیں جہاں لوگوں کو بنیادی حقوق سے یکسر محروم کردیا گیا ہے۔

میر شاہد سلیم نے اقوام متحدہ کی قراردادوں اور کشمیریوں کی خواہشات کے مطابق مسئلہ کشمیر کے فوری حل پر زور دیا تاکہ خطے میں پائیدار امن و استحکام ممکن بنایا جاسکے۔