افغانستان میں امریکا کی ذلت آمیز شکست، حریت رہنما نے بڑا بیان جاری کردیا

?️ 20 اگست 2021

سرینگر (سچ خبریں)  افغانستان میں امریکا کی ذلت آمیز شکست پر حریت رہنما سید علی شاہ گیلانی نے بڑا بیان جاری کرتے ہوئے کہا ہے کہ جس طرح امریکا کو افغانستان چھوڑ کر بھاگنا پڑا عنقریب بھارت اور اسرائیل بھی مقبوضہ علاقوں کو چھوڑنے پر مجبور ہوں گے۔

تفصیلات کے مطابق مقبوضہ کشمیر میں حریت رہنما سید علی شاہ گیلانی نے ایک بیان جاری کرتے ہوئے کہا کہ جس طرح افغانستان مقامی مفاد پرست عناصر اور بیرونی طاقتوں کی ملی بھگت کی وجہ سے اسلام اور مسلمانوں کے خلاف سازشوں کا ایک اڈہ بن گیا تھا وہ یقیناً پورے عالم اسلام کے لیے ایک زبردست تشویش کا موجب تھا لہٰذا سازشوں اور ریشہ دوانیوں کے اس مرکز کا قلع قمع ہونا ہم سب کے لیے باعث اطمینان ہے اور ہم سب کو اس فتح کے جشن میں شریک ہوکر اسلام اور مسلم دشمنوں کے سامنے اپنی دینی حمیت اور اخوت کا مظاہرہ کرنے کے ساتھ ساتھ افغانستان کی تعمیر و ترقی میں بقدر استطاعت تعاون کرنا چاہیے۔

انہوں نے مزید کہا کہ مسلمانوں کے لیے یہ پیغام ہے کہ مخالف حالات سے مایوس اور بددل ہونے کے بجائے انہیں اللہ کی ذات پر توکل کرتے ہوئے صبرو استقامت کے ساتھ اپنی جدوجہد کو جاری رکھنا چاہیے، وہیں دوسری طرف اس میں بھارت اور اسرائیل جیسی غاصب قوتوں کے لیے بھی ایک تنبیہ ہے کہ طاقت کے نشہ میں بدمست ہوکر وہ یہ نہ سمجھ بیٹھیں کہ ان کے ظلم و جبر نے مظلوموں کو ہمیشہ کے لیے دبا دیا ہے، جلد یا بدیر انہیں اسی ہزیمت کے ساتھ اپنا بوریا بستر لپیٹ کر مقبوضہ علاقوں سے نکل بھاگنا ہوگا جیسے امریکا اور اس کے افغان حواری بھاگ کھڑے ہوئے ہیں۔

ان کا کہنا تھا کہ باطل چاہے جتنا بھی وقتی طور پر اچھل کود لے لیکن انجام کار اسے شکست سے دوچار ہوکر رہنا ہے کیونکہ غلبہ صرف حق کے لیے ہے۔