مقبوضہ جموں وکشمیر،بھارت میں 6 ماہ میں 3ہزار سے زائد گھر مسمار ، 27ہزار لوگ بے گھر

?️ 23 اکتوبر 2025

سرینگر: (سچ خبریں) بھارت کے غیر قانونی زیر قبضہ جموں و کشمیر کے عوام اور بھارت بھر میں مسلمانوں کے گھروں کو مسمار کرنے اور جبری نقل مکانی کی ایک منظم مہم کا سامنا ہے ۔ نریندر مودی کی زیر قیادت بی جے پی کی ہندو توا بھارتی حکومت ایک منصوبہ بند سازش کے تحت مختلف حیلے بہانوں سے مسلمانوں کو نشانہ بنارہی ہے۔
کشمیرمیڈیاسروس کی طرف سے آج جاری کی گئی ایک رپورٹ میں کہا گیا کہ بھارت نے رواں برس کے دوران اب تک مختلف بہانوں سے 38 بیگناہ کشمیریوں کے مکان مسمار کئے ہیں۔انسانی حقوق کے گروپوں کا کہنا ہے کہ کشمیری مسلمانوں کے گھروں کی مسماری کی یہ مہم علاقے میں آبادی کے تناسب کو تبدیل کرنے کی منظم بھارتی مہم کا حصہ ہے۔بھارت مقبوضہ علاقے میں مسلمانوں کی اکثریت کو اقلیت میں تبدیل کرنے کی کوششوں میں مصروف ہے اور یہ وہی پالیسی ہے جو اسرائیل نے فلسطین میں اپنا رکھی ہے۔

نئی دلی کے مسلط کردہ لیفٹیننٹ گورنر کے ماتحت انتظامیہ نے مقبوضہ علاقے میں بڑے پیمانے مسلمانوں کے گھروں ، زمینوں اور دیگر املاک کی ضبطی اور مسماری کی مہم شروع کر رکھی ہے۔مودی حکومت ایک طرف کشمیرمیں حالات معمول کے مطابق ہونے کا دعوی ٰ کر کے عالمی براردی کو گمراہ کرنے کی کوشش کر رہی ہے جبکہ دوسری طرف سے اس نے علاقے میں جبر و استبداد کے تمام ریکارڈ توڑ دیے ہیں اور کشمیریوں کے تمام بنیادی حقوق سلب کر لیے ہیں۔ اس نے بھارتی قبضے کو چیلنج کرنے کی پاداش کشمیریوں کا جینا حرام رکھا ہے اور وہ ان سے انکی شناخت ، تہذیب و تمدن غرض سب کچھ چھیننے پر تلی ہوئی ہے۔

مودی حکومت نے رواں برس کے پہلے چھ ماہ میں بھارت میں 3ہزار سے زائد مسلمانوں کے گھروں کو بلڈوز کیا ہے ۔ حال ہی میں ”آئی لومحمدﷺ“ مہم کی پاداش میں کئی مسلمانوں کے گھر مسمار کیے گئے۔

کے ایم ایس رپورٹ میںکہا گیا کہ بھارت کی حکمراں جماعت بی جے پی اور اس سے منسلک ہندو انتہا پسند تنظیموں کی طرف سے مسلمانوں اور اقلیتوں کے خلاف تعصب اور ناروا سلوک تھمنے کا نام نہیں لے رہا۔جب سے بی جے پی اقتدارمیں آئی ہے تب سے بھارتی معاشرے میں نفرت اور مذہبی منافرت پھیلائی جارہی ہے۔ عالمی برادری کو چاہیے کہ وہ مقبوضہ جموں وکشمیر اور بھارت میں مسلمانوں کو نشانہ بنانے کی اس منظم مہم کا نوٹس لے اور مودی حکومت کو انسانی حقوق کے عالمی اعلامیے پر عملدرآمد کرانے کیلئے مجبور کرے۔