قومی اسمبلی: یوم استحصال کشمیر پر بھارتی اقدامات کی مذمت میں قراردادیں متفقہ منظور

?️ 5 اگست 2025

اسلام آباد: (سچ خبریں) قومی اسمبلی میں بھارت کی جانب سے 2019 میں کیے گئے متعصبانہ اقدامات کی مذمت کے لیے ’5 اگست یوم استحصال کشمیر‘ کے موقع پر پیش کی گئی مذمتی قراردادیں متفقہ طور پر منظور کرلی گئیں۔

ڈان نیوز کے مطابق وفاقی وزیر امیر مقام نے قرارداد قومی اسمبلی میں پیش کی، انہوں نے کہا کہ بھارت کے معتصابہ اقدامات کی شدید مذمت کرتے ہیں، شازیہ مری نے انگریزی زبان میں یوم استحصال کشمیر پر قرارداد پیش کی، دونوں قراردادیں متفقہ طور پر منظور کی گئیں۔

وفاقی وزیر امیر مقام نے قرارداد قومی اسمبلی میں پیش کی، جس میں کہا گیا تھا کہ بھارت کے معتصابہ اقدامات کی شدید مذمت کرتے ہیں، بھارت مقبوضہ کشمیر میں ظلم و جبر کا بازار گرم رکھے ہوئے ہیں، حالیہ معرکہ حق نے بھارتی غرور کو خاک میں ملادیا۔

امیر مقام کی قرارداد میں مزید کہا گیا کہ معرکہ حق کی وجہ سےکشمیری بہن بھائیوں کے حوصلے بلند ہوئے، پاکستان تحریک انصاف (پی ٹی آئی) کی 5 اگست کو احتجاج کی کال افسوس ناک ہے۔

پاکستان پیپلز پارٹی (پی پی پی) کی رکن قومی اسمبلی (ایم این اے) شازیہ مری کی انگریزی زبان میں پیش کی گئی قرارداد میں کہا گیا تھا کہ بھارت کی جانب سے یکطرفہ اقدامات جموں و کشمیر کی خصوصی حیثیت کو ختم نہیں کر سکتے۔

شازیہ مری کی قرارداد میں کہا گیا کہ مسئلہ جموں و کشمیر کا حل کشمیری عوام کی خواہشات اور اقوام متحدہ کی قراردادوں کے مطابق تلاش کیا جائے، جموں و کشمیر برصغیر کی تقسیم کا نامکمل ایجنڈا ہے۔

شازیہ مری کی قرارداد میں مزید کہا گیا کہ 5 اگست یوم سیاہ ہے، 5 اگست سے جموں و کشمیر میں مظالم کا ایک لامتناہی سلسلہ جاری ہے، پاکستانی قوم مظلوم کشمیریوں کی ہر فورم پر حمایت جاری رکھے گی۔