شب قدر کے موقع پر کشمیریوں کو جامع مسجد سرینگر عبادات سے روکنے پر قابض انتظامیہ کی شدید مذمت

?️ 28 مارچ 2025

سرینگر: (سچ خبریں) غیر قانونی طور پر بھارت کے زیر قبضہ جموں و کشمیر میں بھارتی قابض انتظامیہ نے جمعتہ الوداع کے موقع پر بھی کشمیری مسلمانوں کو تاریخی جامع مسجد سرینگر نماز جمعہ اداکرنے کی اجازت نہیں دی اور کل جماعتی حریت کانفرنس کے سینئر رہنما میر واعظ عمر فاروق کو مسلسل گھر میں نظر بند رکھا۔

کشمیرمیڈیاسروس کے مطابق قابض انتظامیہ نے شب قدر کے موقع پر بھی کشمیریوں کو جامع مسجد میں عبادت کرنے کی اجازت نہیں دی تھی اور میر واعظ عمر فاروق کو گھر میں نظر بند رکھا تھا۔

ادھرکل جماعتی حریت کانفرنس کے سینئر رہنما میر واعظ عمر فاروق نے سوشل میڈیا پر قابض انتظامیہ کی طرف سے جامع مسجد سرینگر کو بند کرنے اور انکی گھر میں نظربندی کی سخت مذمت کی ہے۔

انہوں نے قابض انتظامیہ سے سوال کیاکہ کشمیریوں کی مذہبی شناخت کے اہم ترین مرکز کو کیوں باربار نشانہ بنایا جاتاہے اور لوگوں کے مذہبی آزادی کے بنیادی حق کی خلاف ورزی کرتے ہوئے انہیں جامع مسجد میں عبادات اور نمازوں کی ادائیگی کی اجازت نہیں دی جاتی۔

انہوں نے قابض انتظامیہ کی اس پابندی کو انتہائی افسوسناک اورمسلمانوں کے مذہبی امور میں صریحا مداخلت قراردیا۔ انہوںنے کہاکہ قابض انتظامیہ کی طرف سے جامع مسجد کی بندش کے فیصلے سے کشمیری مسلمانوں میں شدید غم و غصہ پایاجاتاہے۔

انہوں نے کہاکہ کشمیریوں کو انکی زمینوں،منفرد شناخت، قدرتی وسائل، آزادی اظہاررائے ، پر امن سیاسی سرگرمیوں اور مذہبی آزادی سے محروم کیاجارہاہے ۔ حریت ترجمان وادی کشمیر کے مختلف علاقوں میں بھارتی فورسز کے اہلکاروں کی طرف سے حریت رہنمائوں اور کارکنوں کے گھروں پر چھاپوں اور تلاشیوں کوبدترین سیاسی انتقام قراردیا۔

انہوں نے سرینگر، بارہمولہ، کپواڑہ، کولگام، شوپیاں، پلوامہ، بانڈی پورہ، اسلام آباد،گاندربل اور بڈگام اضلاع میں محاصرے اور تلاشی کی کارروائیوں اور گھروں پر چھاپوں کے دوران بھارتی فورسز اوربدنام زمانہ تحقیقاتی ادارے این آئی اے کے اہلکاروںکی طرف سے لوگوں کو ہراساں کئے جانے پر سخت تشویش کا اظہار کیا ۔