پاکستان اور بھارت کے درمیان جنگ بندی پر کشمیر کے شہریوں کا ردعمل

?️ 10 مئی 2025

اسلام آباد: (سچ خبریں) پاکستان اور بھارت کے درمیان جنگ بندی پر مقبوضہ کشمیر کے شہریوں کا ردعمل آگیا۔الجزیرہ کی رپورٹ کے مطابق پاکستان اور بھارت کے درمیان جنگ بندی کے اعلان کے بعد مقبوضہ کشمیر کے رہائشیوں نے راحت کا احساس کیا اور بہت سے لوگوں نے مسئلہ کشمیر کے دیرپا حل کے لیے دعائیں کیں۔

سری نگر کی رہائشی 25 سالہ رومیسہ خان نے کہا کہ ’میں اس بارے میں بہت پریشان تھی کہ کیا ہورہا ہے، اتنی جانوں کے ضیاع کے بعد یہ سب سے دانشمندانہ فیصلہ ہے، ہم امن اور ان تمام دشمنیوں کا خاتمہ چاہتے ہیں۔

ٹریول ایجنسی کے شعبے سے وابستہ فردوس احمد شیخ نے کہا کہ میرا خوف صرف یہ ہے کہ مستقبل میں معاملات پھر سے بڑھ سکتے ہیں، ان ممالک کو مل بیٹھ کر کشمیر کا سیاسی حل تلاش کرنا چاہیے، میری دعا ہے کہ ہمارے بچوں کو دوبارہ ایسا وقت نہ دیکھنا پڑے۔

مقبوضہ کشمیر کے شہریوں کا کہنا ہے کہ خدا نے ہم پر مہربانی کی ہے۔

اس سے قبل نائب وزیراعظم اسحاق ڈار نے کہا تھا کہ پاکستان اور بھارت نے فوری جنگ پر اتفاق کیا ہے، پاکستان نے ہمیشہ خطے میں امن اور سلامتی کے لیے کوشش کی ہے۔

ان کا کہنا تھا کہ پاکستان نے امن کی کاوشوں میں اپنی خود مختاری اور علاقائی سالمیت پر کبھی سمجھوتہ نہیں کیا۔

اسحاق ڈار کا مزید کہنا تھا کہ آج شام ساڑھے 4 بجے سے سیز فائر نافذ العمل ہوگیا ہے، پاکستان نے واضح کہا تھا کہ بھارت رکے گا تو ہم بھی جواب نہیں دیں گے، بھارت نے جارحیت جاری رکھی جس کا ہم نے بھی مؤثر جواب دیا۔