بھارت جارحانہ ہتھکنڈوں کے ذریعے کشمیریوں کی جدوجہد آزادی کو دبا نہیں سکتا، حریت کانفرنس

?️ 19 ستمبر 2025

سرینگر: (سچ خبریں) کل جماعتی حریت کانفرنس نے کہا ہے کہ بھارت کشمیریوں کی حق پر مبنی جدوجہد آزاد ی کو دبانے کیلئے جارحانہ ہتھکنڈے استعمال کر رہا ہے۔تاہم وہ اپنے مذموم عزائم میں ہرگز کامیاب نہیں ہو گا۔

کشمیرمیڈیاسروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا کہ بھارت نے مقبوضہ کشمیرکو ایک فوجی چھائونی میں تبدیل کر دیا ہے جہاں لاکھوں کی تعداد میں تعینات قابض فوجی نہتے کشمیریوں کو وحشیانہ مظالم اور انسانی حقوق کی سنگین خلاف ورزیوں کانشانہ بنا رہے ہیں۔

کل جماعتی حریت کانفرنس کے ترجمان ایڈووکیٹ عبدالرشید منہاس نے بوٹینگو سوپور میں حریت کانفرنس کے سابق چیئرمین پروفیسر عبدالغنی بٹ کے انتقال پر گہرے رنج و غم کا اظہار کیااورقابض فورسز کی طرف سے سوگوار خاندان کے ساتھ اظہار تعزیت کے لیے جانے والے سوگواروں کو روکنے اورہراساں کیے جانے کی شدیدمذمت کی۔ حریت ترجمان نے سینئر حریت رہنمائوں میر واعظ عمر فاروق، مولانا مسرور عباس انصاری اور دیگر کی گھر وں میں نظربندی کی بھی مذمت کی ۔

ترجمان ایڈووکیٹ عبدالرشید منہاس نے کہاکہ کشمیری عوام گزشتہ سات دہائیوں سے بھارتی تسلط سے آزادی کے لیے بے مثال قربانیاں دے رہے ہیں اور وہ اپنی جدوجہد آزادی کواسکے منطقی انجام تک جاری رکھنے کیلئے پر عزم ہیں ۔انہوں نے انسانی حقوق کی بین الاقوامی تنظیموں سے اپیل کی ہے کہ وہ غیر قانونی طورپر نظر بند کشمیری سیاسی رہنمائوں، کارکنوں اورنوجوانوں کی رہائی کے لیے اپنا کردار ادا کریں۔

کل جماعتی حریت کانفرنس کے ترجمان ایڈووکیٹ عبدالرشید منہاس نے کہا کہ مقبوضہ کشمیرمیں بھارت کے ظالمانہ اقدامات بین الاقوامی قانون کے تحت انسانیت کے خلاف جرم ہیں۔ انہوں نے اقوام متحدہ کے سیکرٹری جنرل پر زور دیا کہ وہ کشمیریوں کی خواہشات کے مطابق تنازعہ کشمیر کے حل کیلئے اپنا کردار ادا کریں۔