ٹرمپ کا ایران و اسرائیل میں جنگ بندی کا دعویٰ اور حقیقت

سچ خبریں:ٹرمپ نے ایران اور اسرائیل کے درمیان مکمل جنگ بندی کا اعلان کیا، مگر ایرانی و اسرائیلی حکام نے اس کی تصدیق سے گریز کیا۔ قطر کی ثالثی اور امریکی دباؤ کے باوجود ایران نے واضح کیا کہ دشمن کے حملے جاری ہیں اور حقیقی صلح ابھی دور ہے۔

الجزیرہ  نیوز چینل کی رپورٹ کے مطابق، امریکی صدر ڈونلڈ ٹرمپ نے سوشل میڈیا پر ایک پیغام میں اعلان کیا ہے کہ ایران اور اسرائیل کے درمیان مکمل اور جامع جنگ بندی طے پا گئی ہے۔ ان کے مطابق، یہ آتش‌بس 6 گھنٹے بعد شروع ہوگی، 12 گھنٹے تک جاری رہے گی، اور پھر جنگ کا رسمی خاتمہ تصور کیا جائے گا۔

یہ بھی پڑھیں:اسرائیل نے ایران کے سامنے ہتھیار ڈال دیے ؛نیتن یاہو کو جنگ بندی پر مجبور ہونا پڑا

ٹرمپ نے مزید کہا کہ جنگ بندی کا آغاز ایران کرے گا اور 12 گھنٹے بعد اسرائیل بھی شامل ہو گا۔ ٹرمپ نے دونوں فریقین کی ’’استقامت، شجاعت اور دانشمندی‘‘ کی تعریف کی اور دعا دی کہ خداوند ایران، اسرائیل، مشرق وسطیٰ، امریکہ اور پوری دنیا کو برکت دے۔

سی‌ان‌ان سے بات کرتے ہوئے ایک اعلیٰ ایرانی عہدیدار نے واضح الفاظ میں کہا کہ تہران کو کوئی باضابطہ تجویز برائے جنگ بندی موصول نہیں ہوئی۔ ہم ایک پائیدار امن تک جنگ جاری رکھیں گے۔ امریکہ اور اسرائیل کی باتیں صرف ہمارے خلاف حملوں کو جواز دینے کا حربہ ہیں۔

انہوں نے مزید کہا کہ ہم دشمن کے جھوٹ سننے کے بجائے اپنے دفاعی اقدامات کو تیز کر رہے ہیں۔

خبر رساں ادارہ روئٹرز کے مطابق، امریکہ نے قطر کے وزیر اعظم کے ذریعے ایران سے رابطہ کیا اور جنگ بندی پر رضامندی حاصل کرنے کی کوشش کی۔ رائٹرز کے مطابق، قطر کے امیر کو بھی مطلع کیا گیا کہ اسرائیل جنگ بندی پر تیار ہے، بشرطیکہ ایران مستقبل میں کوئی حملہ نہ کرے۔

فاکس نیوز کے مطابق، ٹرمپ نے امیر قطر کو بتایا کہ وہ اسرائیل کو جنگ بندی پر آمادہ کرنے میں کامیاب ہو چکے ہیں۔ اس دعوے میں کہا گیا کہ یہ معاہدہ ٹرمپ، ان کے نائب، اور قطری قیادت کی براہ راست ہم آہنگی سے ممکن ہوا۔

اسرائیلی میڈیا رپورٹس کے مطابق، وزیراعظم بنیامین نیتن یاہو نے اپنی کابینہ کے وزراء کو حکم دیا ہے کہ وہ ٹرمپ کے دعوے پر کوئی تبصرہ نہ کریں۔ عبری ذرائع کے مطابق، یہ خاموشی سیکیورٹی کابینہ کی طویل مشاورت کے بعد اختیار کی گئی ہے۔

 الجزیرة:  جنگ بندی کا امکان موجود مگر ایران امریکہ پر اعتماد نہیں کرتا

ایک ایرانی اہلکار نے الجزیرہ کو بتایا کہ اسرائیلی جارحیت کو ختم کرنے کے لیے جنگ بندی کا امکان زیر غور ہے، تاہم امریکہ پر ہمیں اعتماد نہیں۔ ہم دوست ممالک سے رابطے میں ہیں اور اپنی قومی سلامتی کا دفاع جاری رکھیں گے۔

 NBC نیوز: ٹرمپ کا خوش فہمی پر مبنی تبصرہ

NBC نیوز کے مطابق، ٹرمپ نے دعویٰ کیا کہ

 یہ جنگ بندی محدود نہیں بلکہ دائمی ہوگی، جنگ ختم ہو چکی ہے۔

مگر اسی وقت میڈیا نے اطلاع دی کہ ایران میں صہیونی حملوں کے نتیجے میں دوبارہ فضائی دفاعی نظام فعال ہو چکا ہے۔

مزید پڑھیں:ایران اسرائیل جنگ میں امریکی مداخلت عالمی جنگ کا باعث بنے گی۔ لیاقت بلوچ

ٹرمپ کا جنگ بندی کا اعلان ایک سیاسی حربہ محسوس ہوتا ہے، جس پر نہ ایران نے اعتماد کیا اور نہ اسرائیل نے کھل کر تائید کی۔ تہران میں سخت ردعمل، اسرائیلی خاموشی، اور جاری حملے اس بات کی نشاندہی کرتے ہیں کہ زمینی حقیقت ابھی بھی جنگ اور کشیدگی کی گواہی دے رہی ہے۔