مولانا فضل الرحمان پی ٹی آئی کے ساتھ کیا کر رہے ہیں؟ گورنر خیبر پختونخوا کی زبانی

🗓️ 22 جولائی 2024

سچ خبریں: خیبر پختونخوا کے گورنر فیصل کریم کنڈی نے کہا ہے کہ مولانا فضل الرحمان پی ٹی آئی سے بدلے لے رہے ہیں اسی لیے وہ اسد قیصر کو روزانہ چکر لگوا رہے ہیں۔

مانسہرہ میں میڈیا سے گفتگو کرتے ہوئے فیصل کریم کنڈی نے کہا کہ اسد قیصر کو روزانہ چکر لگوانا مولانا کی فتح ہے۔

ایک سوال کے جواب میں گورنر خیبر پختونخوا نے کہا کہ وزیراعلیٰ علی امین گنڈا پور کی طرف سے بھیجے گئے ہتک عزت کے نوٹسز کی کوئی حیثیت نہیں۔

یہ بھی پڑھیں: پی ٹی آئی اور مولانا فضل الرحمان کے درمیان کیا بات ہوئی؟ بیرسٹر گوہر کی زبانی

انہوں نے وزیراعلیٰ کو صوبے میں 10 سالہ کارکردگی پر مناظرے کا چیلنج بھی دیا۔

یاد رہے کہ چند روز قبل وزیراعلیٰ خیبر پختونخوا علی امین گنڈا پور نے گورنر فیصل کریم کنڈی کو ایک ارب روپے ہرجانے کا نوٹس بھیجا تھا۔

اس نوٹس میں کہا گیا تھا کہ عزم استحکام آپریشن پر دستخط کرنے کا الزام لگایا گیا ہے، حالانکہ وزیراعلیٰ نے اپیکس کمیٹی اجلاس میں آپریشن کے لیے کوئی دستخط نہیں کیے۔

وزیراعلیٰ نے یہ بھی کہا تھا کہ وہ کوئی بھی فیصلہ لینے سے پہلے معاملہ اسمبلی اور کابینہ کے سامنے پیش کریں گے۔

نوٹس میں مطالبہ کیا گیا تھا کہ میرے موکل کی ساکھ کو نقصان پہنچانے پر 50 کروڑ روپے ہرجانہ ادا کیا جائے اور ذہنی تناؤ کا شکار کرنے پر مزید 50 کروڑ روپے ہرجانہ دیا جائے۔

فیصل کریم کنڈی نے کہا کہ صوبے میں گورنر راج نافذ کر کے سیاسی یتیموں کو سیاسی شہید نہیں بننے دیں گے۔

مزید پڑھیں: تحریک انصاف اور جمعیت علمائے اسلام کے اتحاد میں موجود رکاوٹیں

مشیر اطلاعات خیبر پختونخوا بیرسٹر محمد علی سیف نے فیصل کریم کنڈی کے بیان پر ردعمل دیتے ہوئے کہا کہ گورنر فارغ بیٹھے ہیں اور میڈیا میں آنے کے لیے صوبائی حکومت کے خلاف نفرت انگیز بیانات دے رہے ہیں۔

انہوں نے مزید کہا کہ صوبے میں لاقانونیت اس وقت عروج پر تھی جب وفاق اور یہاں آپ کی پارٹی کی حکومت تھی۔