عمران خان کے خلاف کیس کس نوعیت کے ہیں؟اسلام آباد ہائیکورٹ کے فاضل جج کی زبانی

18 جولائی 2024

سچ خبریں: اسلام آباد ہائیکورٹ کے جج جسٹس سردار اعجاز اسحاق خان نے عمران خان کے خلاف سیاسی نوعیت کے مقدمات پر ریمارکس دیے ہیں۔

جسٹس سردار اعجاز اسحاق خان نے بانی پی ٹی آئی کی وکلاء سے ملاقاتوں کے لیے دائر درخواست پر سماعت کی۔ اس موقع پر سپریٹنڈنٹ اڈیالہ جیل نے عمران خان کی جیل ملاقاتوں کی فہرست عدالت میں پیش کی۔

یہ بھی پڑھیں: لاہور ہائیکورٹ کا عمران خان کو تمام مقدمات میں شامل تفتیش ہونے کا حکم

ایڈووکیٹ جنرل نے بتایا کہ اڈیالہ جیل جانے والے افراد کا مطالبہ تھا کہ سب کی ایک ساتھ ملاقات کرائی جائے، بانی پی ٹی آئی کی مقدمات میں نمائندگی کرنے والے وکلاء آتے ہی نہیں، بلکہ سیاسی طور پر متحرک وکلاء بانی پی ٹی آئی سے ملاقات کے لیے آتے ہیں۔

وکیل شعیب شاہین نے کہا کہ ہمارے دونوں اپوزیشن لیڈرز سمیت رہنماؤں کو چار گھنٹے کھڑا رکھ کر ملاقات نہیں کرائی گئی، جبکہ عدالت نے ہفتے میں دو بار ملاقاتوں کا ایس او پی بنانے کا حکم دیا تھا۔

جسٹس سردار اعجاز اسحاق نے ایڈووکیٹ جنرل سے کہا کہ عمران خان پر 200 سے زائد مقدمات درج ہیں، یہ سب سیاسی نتائج والے کیسز ہیں، آپ یہ ظاہر کر رہے ہیں کہ یہ سب حقیقی کیسز ہیں؟ مرکزی وکلاء ملاقات کر کے عدالتوں میں پیش ہونے والے وکلاء کو ہدایات دیتے ہوں گے۔

شعیب شاہین ایڈووکیٹ نے بتایا کہ ہماری گاڑیاں جیل سے ڈیڑھ کلو میٹر پیچھے روک دی جاتی ہیں، عمران خان اور ملاقات کرنے والوں کے درمیان بڑا شیشہ لگا دیا گیا ہے، جس کی وجہ سے کوئی دستاویز نہیں دی جا سکتی، اونچی آواز میں بات کرنی پڑتی ہے، نہ کاغذ لے جا سکتے ہیں اور نہ ہی باہر لا سکتے ہیں۔

جسٹس سردار اعجاز اسحاق نے کہا کہ یہ بالکل بھی قابلِ قبول نہیں ہے، کوئی دستاویز دیکھنے سے نہیں روک سکتے، آئندہ ایسا کیا گیا تو میں توہینِ عدالت کے نوٹس جاری کروں گا، یہ انصاف کے عمل میں رکاوٹ ڈالنے کے مترادف ہے، بانی پی ٹی آئی سے ملاقات کرنے والے بھی جیل حکام کی ایس او پیز پر عمل کریں،ایڈووکیٹ جنرل اسلام آباد نے کہا کہ ہم پھر بھی انہیں موقع دیتے ہیں۔

مزید پڑھیں: عمران خان کی 121 مقدمات میں کارروائی روکنے کی درخواست پر فیصلہ محفوظ

جسٹس سردار اعجاز اسحاق خان نے ایڈووکیٹ جنرل سے کہا کہ یہ آپ کوئی احسان نہیں کر رہے، میں سمجھ نہیں پا رہا کہ آپ اس سب سے کیا حاصل کرنا چاہ رہے ہیں۔