خیبرپختونخوا میں بارشوں اور سیلاب سے ہلاکتوں کی تعداد 400 سے تجاوز کرگئی

?️ 24 اگست 2025

اسلام آباد (سچ خبریں) خیبرپختونخوا میں 15 اگست سے اب تک بارشوں اور سیلاب سے ہونے والے نقصانات کی تفصیل سامنے آگئی۔

پی ڈی ایم اے کی رپورٹ کے مطابق خیبرپختونخوا میں سیلاب کے باعث 406 افراد جاں بحق اور 247 زخمی ہوئے، جاں بحق افراد میں 305 مرد، 55 خواتین اور 46 بچے جبکہ زخمیوں میں 179 مرد، 38 خواتین اور 30 بچے شامل ہیں۔

ترجمان پی ڈی ایم اے کے مطابق ضلع بونیر میں سب سے زیادہ 337 افراد جاں بحق ہوئے، ڈی آئی خان میں چھتیں گرنے سے 8 افراد جاں بحق اور 48 زخمی ہوئے۔

علاوہ ازیں صوبے میں 2945 مکانات کو جزوی نقصان اور 577 مکمل تباہ ہوئے، سیلاب سے 239 اسکول متاثر اور 50 اسکول مکمل تباہ ہوئے۔حادثات سوات، بونیر، باجوڑ، مانسہرہ، شانگلہ، دیر لویر، بٹگرام، ڈی آئی خان اور صوابی میں پیش آئے۔