کورونا کی خطرناک صورتحال پر صدر مملکت کا اظہار تشویش

?️ 30 اپریل 2021

اسلام آباد (سچ خبریں ) صدر مملکت ڈاکٹر عارف علوی نے کورونا کی خطرناک صورتحال پر اظہار تشویش کرتے ہوئے  کہا ہے کہ اگر پاکستان میں کورونا وائرس کیسز مزید بڑھے تو بات اسپتالوں کے بس سے نکل جائے گی۔ احتیاط نہ کی گئی تو ہماری حالت بھی پڑوسی ملک بھارت جیسی ہوسکتی ہے۔

عارف علوی نے کورونا وائرس کی موجودہ صورتحال پر جاری کیے گئے اپنے ویڈیو پیغام میں کہا کہ خطے میں کورونا وائرس کی وجہ سے پریشانی بڑھ رہی ہے۔اُنہوں نے کہا کہ اگر احتیاط نہ کی گئی تو ہماری حالت بھی پڑوسی ملک بھارت جیسی ہوسکتی ہے۔عارف علوی نے کہا کہ نوجوان یہ کہتے ہیں کہ اُنہیں کورونا وائرس سے کوئی خطرہ نہیں تو میری اُن سے درخواست ہے کہ براہِ کرم! اپنے بزرگوں کے لیے احتیاط کریں۔

صدر مملکت نے کہا کہ میں ہماری منظم قوم سے اپیل کرتا ہوں ماسک پہنیں سماجی فاصلہ برقرار رکھیں اور بلا ضرورت گھروں سے باہر نہ جائیں کیونکہ احتیاطی تدابیر ہی اس وائرس کا علاج ہیں۔اُنہوں نے اپیل کرتے ہوئے کہا کہ رمضان، تراویح، یومِ علی اور عید کے موقع پر ماسک پہنیں۔عارف علوی نے مزید کہا کہ علما کی ہدایت کے مطابق بزرگ افراد تراویح میں نہ جائیں۔

واضح رہے کہ این سی او سی کا کہنا ہے کہ گذشتہ 24 گھنٹوں کے دوران کورونا کے 49 ہزار 99 ٹیسٹ کیے گئے، جن میں سے مثبت آنے والے کیسز کی تعداد 5 ہزار 112 رہی، جب کہ 24 گھنٹوں میں کورونا کے ٹیسٹ مثبت آنے کی شرح 10.41 فی صد رہی۔

مجموعی اموات کی تعداد 17 ہزار 811 ہو گئی ہے، جب کہ مجموعی کیسز کی تعداد 8 لاکھ 20 ہزار 823 ہو گئی، جن میں سے 7 لاکھ 11 ہزار 465 مریض صحت یاب ہو چکے ہیں۔این سی او سی کے مطابق تشویش ناک مریضوں کی تعداد 5 ہزار 360 ہے، جب کہ ملک میں فعال کیسز کی تعداد 91 ہزار 547 تک پہنچ گئی، اب تک ملک میں 1 کروڑ، 17 لاکھ 88 ہزار 126 کرونا ٹیسٹ کیے جا چکے ہیں۔