کاروباری رہنماؤں کا ’سفاکانہ‘ ٹیکس قانون پر ملک گیر ہڑتال کا انتباہ

?️

کراچی: (سچ خبریں) کراچی چیمبر آف کامرس اینڈ انڈسٹری (کے سی سی آئی) نے سیلز ٹیکس ایکٹ کی شق ’37 اے‘ اور ’37 بی‘ کو کاروبار دشمن قرار دیتے ہوئے خبردار کیا ہے کہ اگر ان شقوں کو فوری طور پر واپس نہ لیا گیا تو ملک گیر ہڑتال کی جائے گی۔

صدر جاوید بلوانی نے واضح کیا کہ احتجاج تب تک جاری رہے گا جب تک یہ ’سخت گیر‘ قوانین مکمل طور پر منسوخ نہیں ہو جاتے۔

ڈان اخبار کی رپورٹ کے مطابق کراچی چیمبر آف کامرس اینڈ انڈسٹری (کے سی سی آئی) نے اعلان کیا ہے کہ اگر تمام چیمبرز متفقہ طور پر سیلز ٹیکس ایکٹ کی شق ’37 اے‘ اور ’37 بی‘ کی مخالفت کریں، تو وہ ملک گیر مکمل ہڑتال کی بھرپور حمایت کرے گا، ان شقوں کو چیمبر نے سخت گیر اور کاروباری ماحول کے لیے نقصان دہ قرار دیا ہے۔

کے سی سی آئی میں پریس کانفرنس سے خطاب کرتے ہوئے صدر جاوید بلوانی نے کہا کہ چیمبر ساتوں صنعتی ایسوسی ایشنز کے ساتھ مل کر ان شقوں کے خلاف کسی بھی مشترکہ ہڑتال کی کال کی مکمل حمایت کرے گا۔

انہوں نے خبردار کیا کہ بینرز لگانا اور پریس کانفرنسز کرنا محض آغاز ہے، احتجاج اس وقت تک بڑھتے رہیں گے جب تک حکومت شق 37 اے اور 37 بی کو مکمل طور پر واپس نہیں لیتی۔

جاوید بلوانی نے انکشاف کیا کہ فیڈرل بورڈ آف ریونیو (ایف بی آر) کے حکام نے ان سے رابطہ کر کے شق 37 اے پر عمل درآمد کے لیے ایس او پیز (معیاری طریقہ کار) تیار کرنے پر بات کی تھی، تاہم انہوں نے ان تجاویز کو واضح طور پر مسترد کرتے ہوئے کہا کہ کاروباری برادری کے متفقہ مطالبے کے مطابق ہم ایس او پیز کو مسترد کرتے ہیں اور اپنے واحد مطالبے کو دہراتے ہیں کہ شق 37 اے کو مکمل طور پر ختم کیا جائے۔

ممکنہ ہڑتال کے ٹائم فریم سے متعلق ان کا کہنا تھا کہ اس بارے میں حتمی فیصلہ دیگر چیمبرز، تجارتی اداروں اور متعلقہ اسٹیک ہولڈرز سے مشاورت کے بعد کیا جائے گا۔

انہوں نے ان شقوں کے تحت ایف بی آر کو حاصل گرفتاری کے وسیع اختیارات کو تنقید کا نشانہ بناتے ہوئے کہا کہ یہ قوانین پاکستان کی کاروبار دوست حیثیت کو متاثر کرتے ہیں اور ملکی و غیر ملکی سرمایہ کاروں کے لیے خوف کا باعث بن سکتے ہیں۔

جاوید بلوانی کا کہنا تھا کہ شق 37 اے پاکستان میں کاروبار کے ماحول سے مطابقت نہیں رکھتی۔

ان کے مطابق کے سی سی آئی کو مسلسل ایسی شکایات موصول ہو رہی ہیں کہ یہ شقیں کاروباری افراد پر نفسیاتی دباؤ ڈالتی ہیں اور ہراسانی کا سبب بن رہی ہیں۔

انہوں نے زور دیا کہ یہ قانون اُن ٹیکس دہندگان کو نشانہ بنا رہا ہے جو پہلے ہی نظام میں رجسٹرڈ ہیں، بجائے اس کے کہ ٹیکس چوری کے اصل اسباب پر توجہ دی جائے۔

صدر کے سی سی آئی نے کہا کہ پاکستان کی معیشت کا صرف 40 فیصد حصہ دستاویزی ہے، جس میں سے بمشکل 2 فیصد بدعنوانی میں ملوث ہو سکتا ہے، لیکن اب 98 فیصد قانون کے مطابق ٹیکس دینے والے کاروبار بھی ہراسانی کا شکار ہو رہے ہیں۔

انہوں نے حکومت کو تجویز دی کہ وہ جعلی یا فرضی رسیدیں جاری کرنے والوں کے خلاف کارروائی کرے، نہ کہ ان کاروباری افراد پر دباؤ ڈالے جو پہلے ہی ٹیکس نیٹ میں ہیں۔

جاوید بلوانی نے ایف بی آر کی ناقص کارکردگی پر روشنی ڈالتے ہوئے کہا کہ عدالتوں میں ایسے بیشتر مقدمات کا فیصلہ ٹیکس دہندگان کے حق میں آیا، جب کہ صرف چند مقدمات میں ٹیکس حکام کو کامیابی ملی۔

ان کا کہنا تھا کہ کے سی سی آئی نے ٹیکس نظام میں 30 خامیوں کی نشاندہی کی ہے، جن میں سے پانچ یا چھ کو اتنا سنگین قرار دیا گیا ہے کہ ان کی موجودگی میں ٹیکس ریٹرن جمع کرانا تقریباً ناممکن ہو جاتا ہے۔

انہوں نے زور دیا کہ ان خامیوں کو فوری طور پر قانون سازی کے ذریعے دور کیا جائے۔

بزنس مین گروپ کے چیئرمین زبیر موتی والا نے بھی جاوید بلوانی کے خدشات سے اتفاق کرتے ہوئے خبردار کیا کہ اگر گرفتاری کے اختیارات کو بغیر کسی نگرانی کے چھوڑ دیا گیا، تو اس سے بڑے پیمانے پر ہراسانی اور بدعنوانی کو فروغ ملے گا۔

انہوں نے کہا کہ گرفتاری کے اختیارات رکھنے والے اہلکار ان اختیارات کو ذاتی مفاد کے لیے غلط استعمال کر سکتے ہیں، اور دیانت دار ٹیکس دہندگان کو غیر قانونی مطالبات ماننے پر مجبور کر سکتے ہیں تاکہ وہ اپنی عزت بچا سکیں۔

انہوں نے حکومت پر زور دیا کہ وہ ٹیکس نیٹ سے باہر افراد کو نشانہ بنائے، نہ کہ پہلے سے دستاویزی معیشت پر مزید بوجھ ڈالے۔

مشہور خبریں۔

صیہونی حکومت کے چیف آف اسٹاف کا ایک عرب ملک کے دورہ کا ارادہ

?️ 16 جولائی 2022سچ خبریں:   عبوری صیہونی حکومت کے اعلیٰ ترین فوجی اہلکار کے بحرین

کیا مصر بھی برکس میں شامل ہونے والا ہے؟

?️ 26 اگست 2023سچ خبریں: مصر کے صدر عبدالفتاح السیسی نے مصر کو اس گروپ

ایران اور ترکی کے وزرائے خارجہ کی ملاقات، دوطرفہ اور علاقائی امور پر تبادلۂ خیال

?️ 30 جنوری 2026ایران اور ترکی کے وزرائے خارجہ کی ملاقات، دوطرفہ اور علاقائی امور

 صہیونی دشمن کا بھی یمن میں امریکہ جیسا انجام ہوگا : حزب اللہ

?️ 8 جولائی 2025سچ خبریں: حزب اللہ لبنان نے صہیونی ریجیم کے یمن پر حملوں

حکومت کی معاشی ٹیم ناکام نظر آرہی ہے

?️ 26 اگست 2021اسلام آباد(سچ خبریں ) وزیراعظم عمران خان اور ان کی معاشی ٹیم

عراق میں بعثی رہنماؤں کو حکومت میں شامل کرنے کی مبینہ کوششیں

?️ 7 دسمبر 2025سچ خبریں:عراق کے سابق پارلیمانی اسپیکر محمد الحلبوسی پر الزامات ہیں کہ

ترک تجزیہ کاروں کے نقطہ نظر سے اردوغان-ٹرمپ ملاقات؛ کیا غزہ کا کوئی ذکر تھا؟ – حصہ 1

?️ 26 ستمبر 2025سچ خبریں: جسٹس اینڈ ڈیولپمنٹ پارٹی کے قریبی تجزیہ کار اس ملاقات

رکن پنجاب اسمبلی بلال یاسین پر فائرنگ کیس میں اہم پیشرفت ہوئی ہے

?️ 17 جنوری 2022لاہور (سچ خبریں) مسلم لیگ(ن) کے رکن پنجاب اسمبلی بلال یاسین پر

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے