چینی اسکینڈل میں زرداری اور شریف خاندان ملوث ہیں، اربوں روپے کمائے، عمر ایوب

?️ 28 جولائی 2025

پشاور: (سچ خبریں) قومی اسمبلی میں قائد حزب اختلاف عمر ایوب نے الزام عائد کیا ہے کہ ملک میں چینی کی ذخیرہ اندوزی کی جارہی ہے، چینی اسکینڈل میں شریف اور زرداری خاندان ملوث ہیں جنہوں نے اربوں روپے کمائے۔

پشاور ہائیکورٹ میں پیشی کے بعد میڈیا سے گفتگو میں عمر ایوب نے کہا کہ حکومت نے پہلے 5 لاکھ ٹن چینی درآمد کی، اس کے بعد 5 لاکھ ٹن چینی برآمد کی، ملک میں مہنگائی خطرناک حد تک بڑھ گئی ہے۔

انہوں نے کہا کہ ڈیڑھ ہزار روپے والا بجلی کا بل 15 ہزار روپے تک جاپہنچا ہے، پیٹرول، گیس اور دیگر اشیا مہنگی ہیں۔

عمر ایوب نے کہا کہ بانی پاکستان تحریک انصاف (پی ٹی آئی) عمران خان اور اہلیہ بشریٰ بی بی کے ساتھ جیل میں برا سلوک کیا جارہا ہے۔

انہوں نے کہا کہ ضلع خیبر کی وادی تیراہ میں شہریوں پر فائرنگ کے واقعے پر افسوس ہے اور اظہار مذمت کرتے ہیں، نہتے عوام پر فائرنگ کس نے کی انکوائری کی جائے، عوام پر فائرنگ کا رد عمل انتہائی خراب ہوسکتا ہے، آل پارٹیز کانفرنس میں آپریشن کی مخالفت کی گئی ہے۔

اپوزیشن لیڈر نے کہا کہ 5 اگست کو پر امن احتجاج ہوگا، احتجاج کے لیے تیاریاں مکمل ہیں، محسن نقوی 450 ارب روپے کی گندم کا حساب دیں، رانا ثنا اللہ انسداد منشیات فورس (اے این ایف) سے یا تو معافی منگوائے یا ڈائریکٹر جنرل (ڈی جی) اے این ایف سے ثبوت مانگیں۔

انہوں نے کہا کہ رانا ثنااللہ اپنے اوپر منشیات کیس پر پہلے پوچھ لیں، پھر بات کریں، وفاقی وزیر داخلہ محسن نقوی نگران دور حکومت 450 ارب روپے کے گندم درآمد کرنے کے کیس میں ملوث ہیں، اس کے خلاف نیب کا کیس بنتا ہے۔

عمر ایوب نے کہا کہ 5 اگست کے احتجاج میں ہمارے ساتھ اپوزیشن کی کچھ جماعتیں بھی ہوں گی، ہمارا احتجاج پر امن ہوگا، احتجاج کے لائحہ عمل کا اعلان دو سے تین روز میں کیا جائے گا۔