پیر سے متاثرہ علاقوں میں اسمارٹ لاک ڈاؤن لگایا جا سکتا ہے:وزیر داخلہ

?️ 21 مارچ 2021

اسلام آباد (سچ خبریں) وفاقی وزیرداخلہ شیخ رشید احمد نے ملک بھر میں کورونا کیسز کی صورتحال کو دیکھتے ہوئے  یہ واضح کر دیا ہے کہ  پیر سے متاثرہ علاقوں میں مکمل لاک ڈاؤن نافذ کیا جا سکتا ہے۔انہوں نے وضاحت کی کہ جن علاقوں میں وبا زیادہ پھیل رہی ہے وہاں اسمارٹ لاک ڈاؤن لگایا جا سکتا ہے۔

تفصیلات کے مطابق نجی ٹی وی چینل کے ایک پروگرام میں گفتگو کرتے ہوئے انہوں نے کہا کہ کورونا کے معاملات دیکھنے والا ادارہ پیر کو اجلاس کے بعد فیصلہ کرے گا ، جن علاقوں میں وبا زیادہ پھیل رہی ہے وہاں اسمارٹ لاک ڈاؤن نافذ ہوسکتا ہے۔

وفاقی وزیر داخلہ نے کہا کہ قوم سنجیدگی کا مظاہرہ نہیں کررہی ، میں نے دیکھا ہے کہ لوگ ماسک نہیں لگا رہے ، بس اللہ تعالیٰ ہی ملک پر اپنا خاص کرم کرے تاہم اب ہم بہتر پوزیشن میں ہے کیوں کہ ہمارے پاس اب ویکسی نیشن ، وینٹی لیٹر اور بیماری کے حوالے سے معلومات ہیں ، اس ساری صورت حال کا بہتر اور اچھے انداز سے مقابلہ کرسکتے ہیں۔

دوسری طرف کورونا وائرس کے سبب پاکستان میں مزید 44 افراد جان کی بازی ہار گئے جب کہ 3 ہزار 667 نئے کیسز سامنے آئے ہیں  نیشنل کمانڈ اینڈ کنٹرول سینٹر کے مطابق پاکستان میں کورونا سے اموات کی مجموعی تعداد 13 ہزار843تک پہنچ گئی ہے اور عالمی وباء سے متاثرہ افراد کی مجموعی تعداد 6 لاکھ 26 ہزار802 ہو چکی ہے اور ملک بھرمیں ایکٹو کیسز کی تعداد31 ہزار107ہے۔

بتایا گیا ہے کہ کورونا وباء کے سبب سب سے زیادہ اموات صوبہ پنجاب میں ہوئیں جہاں 5 ہزار 974 افراد جان کی بازی ہار چکے ہیں ، جب کہ صوبہ سندھ میں 4 ہزار479، خیبر پختونخوا 2 ہزار 208، اسلام آباد میں 543، گلگت بلتستان میں 103، بلوچستان میں 203 اور آزاد کشمیر میں 333 افراد جان کی بازی ہار چکے ہیں۔

این سی او سی کے مطابق اسلام آباد میں کورونا کیسزکی تعداد51 ہزار 414، خیبرپختونخوا میں 79ہزار245، سندھ 2 لاکھ 63 ہزار58، پنجاب میں ایک لاکھ 97 ہزار177، بلوچستان19 ہزار327، آزاد کشمیر11 ہزار609اور گلگت بلتستان میں 4 ہزار 972 افراد کورونا سے متاثر ہوئے ہیں۔