فلسطین کو انسانی امداد کی اشد ضرورت ہے: وزیر خارجہ

?️ 28 مئی 2021

اسلام آباد(سچ خبریں) اسلام آباد میں اقوام متحدہ کی جنرل اسمبلی کے صدر وولکن بوزکر سے ملاقات  کے دوران پاکستانی وزیر خارجہ شاہ محمود قریشی نے کہا کہ اسلام آباد کا اقوام متحدہ سے مطالبہ ہے کہ وہ مسئلہ فلسطین اور مسئلہ کشمیر کے حل کے لئے عملی طور پر اقدام کرے  جو گذشتہ سات دہائیوں سے حل طلب ہے۔

تفصیلات کے مطابق پاکستانی وزیر خارجہ نے اسلام آباد میں اقوام متحدہ کی جنرل اسمبلی کے صدرسے ملاقات کی ، جو  اسلام آباد کے دورے پر ہیں۔ وزیر خارجہ نے  مقبوضہ علاقوں میں حالیہ پیشرفتوں کا جائزہ لینے اور فلسطینیوں کو انسانی امداد کی ضرورت پر زور دیا۔

ریڈیو پاکستان کے مطابق، پاکستانی وزیر خارجہ شاہ محمود قریشی نے اقوام متحدہ کی جنرل اسمبلی کے صدر وولکن بوزکر سے ملاقات میں  فلسطین ، افغانستان اور کشمیر سمیت دیگر امور پر تبادلۂ خیال کیا۔دوطرفہ ملاقات کے بعد دونوں فریقوں نے مشترکہ نیوز کانفرنس کی اور اعلان کیاکہ  اقوام متحدہ کے نزدیک ایک  اہم ترین مسئلے کے طور پر ، مسئلہ فلسطین کو فوری طور پر ایک منصفانہ حل کی ضرورت ہے۔

وزیر خارجہ نے مزید  کہا کہ پاکستان نے فسلطینی عوام کی آواز پوری دنیا کے کونے کونے تک پہنچانے میں اہم کردار ادا کیا ہے ۔ ان کا کہنا تھا کہ اسرائیلی جارحیت کے نتیجے میں متاثرہ فلسطینیوں کے لئے انسانی امداد ضروری ہے۔

دوسری جانب صدر وولکن بوزکر نے بھی وزیر خارجہ شاہ محمود کو خراجِ تحسین پیش کرتے ہوئے کہا شاہ محمود نے فلسطینیوں کے لیے مضبوط مؤقف اور حمایت کا اظہار کیاہے ، مجھے جموں و کشمیر کی صورت حال کا بھی بخوبی علم ہے، جنوبی ایشیا میں خوش حالی کا دار و مدار پاک بھارت تعلقات پر ہے، خطے میں امن و خوش حالی کے لئے تنازعہ کشمیر کا حل نکالنا ضروری ہے۔