اسلام آباد(سچ خبریں)وزیر خارجہ شاہ محمودقریشی اور ہنگری کےوزیرخارجہ کی ملاقات میں دونوں وزرائے خارجہ میں تجارت اور زراعت سمیت مختلف شعبہ جات میں تعاون کے فروغ پربھی اتفاق کیا گیا۔ وزیر خارجہ نے کہا کہ پاکستان ہنگری سےدو طرفہ تعلقات کواہمیت دیتا ہے۔
تفصیلات کے مطابق وزیر خارجہ شاہ محمودقریشی سے ہنگری کےوزیرخارجہ کی وزارت خارجہ میں ملاقات ہوئی، شاہ محمودنےہنگری کےوزیرخارجہ کووزارت خارجہ آمد پرخوش آمدیدکہا ۔ملاقات میں دو طرفہ تعلقات،تجارتی واقتصادی تعاون کےفروغ پرتبادلہ خیال کیا گیا ، وزیر خارجہ شاہ محمودقریشی نے کہا کہ ہنگری یورپ کےاہم ممالک میں شامل ہے، پاکستان ہنگری سےدو طرفہ تعلقات کواہمیت دیتا ہے۔
شاہ محمود قریشی نے ہنگری کےوزیرخارجہ مقبوضہ کشمیر میں انسانی حقوق کی خلاف ورزیوں سےآگاہ کرتے ہوئے کہا پاکستان خطےمیں امن کیلئےمصالحانہ کوششیں بروئےکارلارہاہے۔وزیر خارجہ کا کہنا تھا کہ حکومت جغرافیائی اقتصادی ترجیحات پرتوجہ مرکوزکیےہوئےہے، پاکستان220ملین آبادی پرمشتمل ابھرتی ہوئی مارکیٹ ہے اور پاکستان میں سرمایہ کاری کےوسیع مواقع موجودہیں۔
ان کا کہنا تھا کہ حکومت سرمایہ کاروں کوٹیکس چھوٹ سمیت پرکشش مراعات دےرہی ہے جبکہ بیرونی سرمایہ کاروں کی سہولت کیلئے ای ویزہ کاآغازکیا ہے۔دونوں وزرائے خارجہ میں زراعت سمیت مختلف شعبہ جات میں تعاون کے فروغ پراتفاق کیا گیا ، ہنگری وزیر خارجہ نےافغان امن عمل کیلئےپاکستان کی مصالحانہ کوششوں کو سراہا۔
