اسلام آباد (سچ خبریں) وزیر خارجہ شاہ محمود قریشی نے او آئی سی کے سیکرٹری جنرل سے ٹیلیفونک رابطہ کرکے افغانستان کی موجودہ صورتحال پر تبادلہ خیال کیا اور کہا عالمی برادری افغانستان کی بحالی،معاشی معاونت کیلئے کردار ادا کرے، افغانستان میں قیام امن کیلئے مثبت کردار کیلئے پر عزم ہیں۔
تفصیلات کے مطابق وزیر خارجہ شاہ محمود قریشی نے او آئی سی کے سیکرٹری جنرل سے فون پر رابطہ کیا ، جس میں افغانستان کی موجودہ صورتحال پر تبادلہ خیال کیا گیا۔ شاہ محمود قریشی نے کہا کہ افغانستان میں قیام امن کیلئے مثبت کردار کیلئے پر عزم ہیں، توقع ہے افغان رہنما سیاسی تصفیے کیلئے مذاکرات سے فائدہ اٹھائیں گے اور کابل میں کامیاب مذاکرات افغانستان سمیت خطے کیلئے بہتری کا باعث ہوں گے۔
وزیر خارجہ کا کہنا تھا کہ افغان شہریوں کی سیکیورٹی اور حقوق کے تحفظ کو یقینی بنایا جائے، عالمی برادری افغانستان کی بحالی ،معاشی معاونت کیلئے کردار ادا کرے اور مسلم امہ بھی پرامن افغانستان کیلئے افغانوں سے یکجہتی کا اظہار کرے۔ وزیر خارجہ نے او آئی سی کے سیکرٹری جنرل کو افغانستان میں اور باہر امن مخالف قوتوں کے خطرے سے آگاہ کرتے ہوئے کہا کابل میں وسیع بنیاد حکومت کے خواہاں ہیں۔