وزیراعظم کے معاون خصوصی نے استعفیٰ دے دیا

?️ 21 ستمبر 2021

اسلام آباد (سچ خبریں) وزیراعظم کےمعاون خصوصی برائے توانائی تابش گوہر نے استعفیٰ دے دیا، وزیر اعظم نے بھی ان کا استعفیٰ قبول کر لیا ہے ، وزیرتوانائی حماد اظہر تابش گوہر کی کارکردگی سے خوش نہیں تھے، تابش گوہر پر مقامی ریفائنریز کو فائدہ پہنچانے کا الزام ہے۔

تفصیلات کے مطابق وزیراعظم کےمعاون خصوصی برائے توانائی تابش گوہر نے استعفیٰ دے دیا ، جس پر وزیراعظم عمران خان نے تابش گوہر کا استعفیٰ قبول کرلیا ہے۔ذرائع کا کہنا ہے کہ وزیرتوانائی حماد اظہر تابش گوہر کی کارکردگی سے خوش نہیں تھے ، وزیرتوانائی حماد اظہر نے وزیراعظم سے ملاقات میں تحفظات کا اظہارکیاتھا۔

تابش گوہر پر مقامی ریفائنریز کو فائدہ پہنچانے کا الزام ہے۔رواں ماہ 13ستمبر کوسی سی اوای اجلاس میں مقامی ریفائنریز کیلئے پیشگی مراعات کیلئے تجاویز دی گئیں ، اجلاس میں تابش گوہر کی تجاویز کو حماد اظہر اور اسدعمر نے مسترد کردی تھیں۔

خیال رہے گذشتہ سال اکتوبر تابش گوہر کو وزیراعظم کا معاون خصوصی برائے توانائی مقرر کیا گیا تھا، اس سے قبل وہ سات سال تک کے الیکٹرک میں بطور سی ای او، ڈائریکٹر اور چیئرمین کے عہدے پر فائز رہے تاہم دوہزار پندرہ میں وہ مستعفی ہوگئے تھے جس کے بعد وہ بجلی و توانائی کے شعبے میں مشاورت اور معاونت دینے کی اپنی کمپنی اوسیس کے بانی و سربراہ بنے تھے۔

بعد ازاں رواں سال مارچ میں ندیم بابرکے معاون خصوصی برائے پٹرولیم کا قلم دان چھوڑنے کے بعد ان کی جگہ پر وزیراعظم نے تابش گوہر کو معاون خصوصی برائے پیٹرولیم کا اضافی چارج دیا تھا۔