وزیراعظم نے بلوچستان میں بارشوں سے نقصانات کی رپورٹ طلب کرلی

?️ 7 جنوری 2022

اسلام آباد (سچ خبریں) بلوچستان میں نارش اور برفباری سے کئی اضلاع میں کافی نقصان ہوا ہے اور مواصلاتی نظام بالکل درہم برہم ہو گیا ہے  تاہم  وزیر اعظم عمران خان  نے بلوچستان میں بارشوں سے نقصانات کی رپورٹ طلب کرتے ہوئے نیشنل ڈیزاسٹرمینجمنٹ اتھارٹی کو متاثرین کو امداد پہنچانے کی ہدایت کردی۔

تفصیلات کے مطابق وزیر اعظم عمران خان نے بلوچستان میں بارشوں سے نقصانات کی رپورٹ طلب کرلی ، رپورٹ وزیراعلیٰ بلوچستان سے طلب کی گئی ہے۔ وزیر اعظم  نے نیشنل ڈیزاسٹر مینجمنٹ اتھارٹی کو متاثرین کو امداد پہنچانے کی ہدایت کرتے ہوئے کہا ہے کہ متاثرین کی ہرممکن مدد کی جائے۔

خیال رہے بلوچستان میں بارش اور برفباری سے مواصلاتی نظام درہم برہم ہوگیا ہے اور کئی اضلاع میں سیلابی صورتحال سے نظام زندگی مفلوج ہے۔ بلوچستان میں شدید بارشوں اور برف باری کے باعث پیدا ہونے والی صورت حال پر پاک فوج اور نیوی بھی ضلعی انتظامیہ کی مدد میں پیش پیش ہے۔

متاثرہ علاقوں میں پاک فوج اور نیوی کا ریلیف آپریشن جاری ہے، جس میں خوراک، پینے کا پانی اوردیگرضروریات زندگی کا سامان فراہم کیا جارہا ہے، بارش اور برفباری اور سیلابی صورتحال سے متاثرہ علاقوں میں عوام کو کافی پریشانی کا سامنا ہے۔