وزیراعظم عمران خان کی  اپنی رہائش گاہ پر  میڈیا ٹیم سے ملاقات

?️ 25 مارچ 2021

اسلام آباد(سچ خبریں) وزیراعظم عمران خان نے قرنطینہ میں ہیں انہوں نے اپنی رہائش گاہ پر  میڈیا ٹیم سے ملاقات کی، ایس اوپیز کو دھیان میں رکھتے ہوئے شرکا کی تعداد کم رکھی گئی، ملاقات کے بعد وزیراعظم کی زیر صدارت اجلاس ہوا جس میں سرکاری معاملات پر گفتگو ہوئی۔

تفصیلات کے مطابق وفاقی وزیراطلاعات شبلی فراز نے سماجی رابطے کی ویب سائٹ ٹوئٹر پر وزیراعظم عمران خان کی بنی گالہ میں میڈیا ٹیم سے ملاقات کی تصویر شیئر کردی۔ملاقات میں زلفی بخاری، فیصل جاوید وزیراعظم کے پرنسپل سیکریٹری اعظم خان اور دیگر لوگ موجود تھے تاہم ایس اوپیز کو دھیان میں رکھتے ہوئے شرکا کی تعداد کم رکھی گئی تھی۔

ملاقات کے بعد وزیراعظم عمران خان کی زیرصدارت اجلاس ہوا ، جس میں سینیٹر شبلی فراز، زلفی بخاری، فیصل جاوید،یوسف بیگ مرزا شریک ہوئے، اس دوران وزیراعظم نے مختلف سرکاری معاملات پربریفنگ لی۔

دوسری جانب سینیٹر فیصل جاوید نے سماجی رابطے کی ویب سائٹ ٹوئٹر پر اپنے پیغام میں کہا ماشاء اللہ سے وزیراعظم ٹھیک اور فٹ ہیں، ایس او پیز پر عمل کرکے گھر سے کام اور میٹنگ کررہے ہیں۔یاد رہے 20مارچ کو وزیراعظم عمران خان اور ان کی اہلیہ کا کورونا ٹیسٹ مثبت آیا تھا ، کورونا ٹیسٹ مثبت آنے پر انھوں نے خود کو قرنطینہ کرلیا تھا۔

دوسری جانب وزیراعظم عمران خان کا کہنا ہے کہ پہلی بار طاقتور مافیا قانون کے تابع آ چکا ہے، سٹہ مافیا اور قبضہ مافیا کیخلاف کارروائیاں جاری رکھیں، اجلاس میں سٹہ مافیا کے خلاف کارروائیوں پر رپورٹ عمران خان کو پیش کی گئی اور ہاؤسنگ، ڈیمز، ادارہ جاتی اصلاحات پر بھی بریفنگ دی گئی۔

وزیراعظم نے کہا پہلی بار طاقتور مافیا قانون کے تابع آ چکا ہے، سٹہ مافیا اور قبضہ مافیا کیخلاف کارروائیاں جاری رکھیں، قانون کی حکمرانی سے کسی کو انکار کی اجازت نہیں۔عمران خان کا کہنا تھا کہ پاکستان عظیم فلاحی ریاست کی جانب کامیابی سے گامزن ہے، ٹیم پوری توجہ احساس پروگرام کے ذریعےغریبوں کے احساس پر لگا دے۔