نجی سکیم کے تحت حاجیوں کے انتظامات اور سعودی پالیسی فالو نہ کرنے پر وزیراعظم کا نوٹس، کمیٹی تشکیل دیدی

5 اپریل 2025

اسلام آباد: (سچ خبریں) وزیراعظم شہباز شریف نے نجی سکیم کے تحت حاجیوں کے بروقت انتظامات اور سعودی پالیسی فالو نہ کرنے کے معاملے کا نوٹس،واقعہ کی تحقیقات کیلئے 3 رکنی اعلیٰ سطح حج انتظامی کمیٹی تشکیل دیدی جس کا نوٹیفکیشن بھی جاری کر دیا گیا، نوٹیفکیشن کے مطابق کمیٹی سیکرٹری کابینہ، چیئرمین ایف بی آر اور چیف سیکرٹری گلگت بلتستان پر مشتمل کمیٹی اپنی سفارشات 3 دن کے اندر وزیراعظم کو پیش کرے گی۔

وزارت مذہبی امور اور بین المذاہب ہم آہنگی کمیٹی کو سیکرٹریٹ سپورٹ فراہم کرے گی۔کمیٹی وزارت مذہبی امور کی جانب سے نجی حج آپریٹرز کیلئے درکار رسمی کارروائیوں کو مکمل کرنے کی کوششوں کا جائزہ لے گی اور سعودی حکام کی مقرر کردہ آخری تاریخ تک عمل مکمل کرنے کی کوشش کرے گی۔

تحقیقاتی کمیٹی سعودی عرب کی حج پالیسی کو وزارت مذہبی امور و نجی حج آپریٹرز کے ذریعے نافذ نہ کرنے کی تحقیقات کرے گی۔

کمیٹی کو اس بات کی تحقیقات کرنے کی ذمہ داری سونپی گئی ہے کہ سعودی عرب کی 2025 کی نظرثانی شدہ پالیسی وزارت مذہبی امور اور نجی حج آپریٹرز کے ذریعے کیوں نافذ نہیں کی گئی۔کمیٹی اس بات کا بھی جائزہ لے گی کہ پاکستان سے ہنگامی بنیادوں پر رقوم بھجوانے کے حوالے سے حکمت عملی کیا ہو سکتی ہے تاکہ 70 ہزار حاجیوں کے مستقبل کو محفوظ بنایا جا سکے۔

کمیٹی کو سنگین کوتاہیوں کی ذمہ داری کا تعین کرنے کیلئے تحقیقات کرنے کی بھی ہدایت دی گئی ہے،کمیٹی کو سنگین کوتاہیوں کی ذمہ داری کا تعین کرنے کیلئے تحقیقات کرنے کی بھی ہدایت دی گئی ہے جس کے نتیجے میں ہزاروں پاکستانی عازمین حج 2025 سے محروم ہو سکتے ہیں۔واضح رہے کہ اس سے قبل وزیراعظم شہباز شریف نے سعودی عرب کی ہدایت پر وزارت مذہبی امور کی جانب سے پرائیویٹ حج آپریٹرز پر پرائیویٹ حج سکیم کے مکمل عملدرآمد میں ناکامی پر تحقیقات کیلئے کمیٹی تشکیل دینے کا فیصلہ کیا تھا۔

بتایا گیا تھا کہ رواں سال پرائیوٹ حج آپریٹرز کے ذریعے ہزاروں پاکستانی عازمین حج سے محروم رہنے کا خدشہ بڑھ گیا تھاکیونکہ حج ٹور آپریٹرز 89,000 پرائیویٹ حاجیوں کیلئے بروقت رہائش گاہیں فراہم نہیں کر سکے تھے۔اس صورتحال کی وجہ سے ہزاروں پاکستانی عازمین حج کو حج 2025 سے محروم کرنے کے سنگین نتائج کا سامنا تھا۔