مولانا فضل الرحمان نے سیلاب کے باعث مردان اور دیر کے جلسے منسوخ کردیے

?️ 5 ستمبر 2025

ڈی آئی خان (سچ خبریں) سربراہ جے یو آئی ف مولانا فضل الرحمان نے سیلاب کے باعث مردان اور دیر کے جلسے منسوخ کر دیے۔

خیبر پختونخوا کے ضلع ڈی آئی خان میں میڈیا سے گفتگو کرتے ہوئے مولانا فضل الرحمان کا کہنا تھا کہ خیبرپختونخوا میں گورننس کا بحران گہرا ہو چکا ہے، جو بحرانوں سے نکال سکتے ہیں وہ خود بحران کا شکار ہیں۔ انہوں نے کہا کہ عوام کو نازک حالات سے آگاہ کرنے کیلئے جلسے کر رہے ہیں، سیلاب کے باعث مردان اور دیر کے جلسے منسوخ کر دیے، 16 اکتوبر کو ڈیرہ میں مفکر اسلام مفتی محمود کانفرنس منعقد ہوگی۔

مولانا فضل الرحمان کا کہنا تھا کہ جے یو آئی نازک حالات میں عوام کو تنہا نہیں چھوڑے گی، تصادم ہماری خواہش نہیں مگر عوام کو سچ بتانا بھی ضروری ہے، خیبرپختونخوا میں حکومت نام کی چیز نہیں، بدامنی و کرپشن عروج پر ہے۔ سربراہ جے یو آئی ف نے کہا کہ سوات و باجوڑ کے حالات کی ذمہ دار ریاست ہے، امن دینا اِس کی ذمہ داری ہے، سوات، وزیرستان اور باجوڑ میں لوگ نقل مکانی پر مجبور ہوئے، ریاستی ادارے اپنی صلاحیتیں بروئے کار لا رہے ہیں مگر ناکافی ہیں۔

ان کا مزید کہنا تھا کہ دہشت گرد اتنے طاقتور ہوچکے کہ ریاستی اداروں کا مقابلہ کر رہے ہیں، جے یو آئی اسلام کی سربلندی اور عوامی مسائل کے حل میں کردار ادا کرتی رہے گی۔