موسم سرما کی چھٹیوں کے بارے میں تین تجاویز سامنے آگئیں

?️ 14 دسمبر 2021

اسلام آباد (سچ خبریں) وزرائے تعلیم کانفرنس میں موسم سرما کی چھٹیوں کیلئے مختلف تجاویز سامنے آگئیں، پہلی تجویز کے تحت 20 دسمبر سے 15جنوری، دوسری تجویز 25 دسمبر سے 20 جنوری اور وفاق کی تجویز ہے کہ 25 دسمبر سے 5 جنوری تک چھٹیاں کی جائیں، چھٹیوں کا حتمی فیصلہ این سی اوسی اجلاس میں متوقع ہے۔

میڈیا رپورٹ کے مطابق وفاقی سیکرٹری تعلیم ناہید درانی کی زیرصدارت موسم سرما کی چھٹیوں کیلئے بین الصوبائی وزرائے تعلیم کانفرنس جاری ہے، بین الصوبائی وزرائے تعلیم کانفرنس میں چھٹیوں کے حوالے سے دو تجاویز زیر غور ہیں، ان تجاویز میں موسم سرما کی چھٹیوں سے متعلق پہلی تجویز 20 دسمبر سے15 جنوری تک چھٹیوں کی ہے، دوسری تجویز 25 دسمبر سے 20 جنوری تک چھٹیاں کرنے کی ہے۔

اسی طرح وفاق کی جانب سے 25 دسمبر سے 5 جنوری تک موسم سرما کی چھٹیاں دینے کی تجویز سامنے آئی ہے، سندھ کے علاوہ باقی تمام صوبے وفاق کی تجویز سے متفق ہیں۔ سندھ حکومت معاملہ صوبائی اسٹیئرنگ کمیٹی میں رکھے گی۔ چھٹیوں کی تجاویز پر حتمی فیصلہ کل این سی اوسی اجلاس میں متوقع ہے۔ ذرائع کا کہنا ہے کہ وزارت صحت کی تجویز ہے کہ سردیوں کی چھٹیاں جنوری کے آخر میں کی جائیں۔
کیونکہ چھٹیاں کرنے سے تعلیمی اداروں میں ویکسینیشن متاثر ہوسکتی ہے۔ جس کے باعث مختلف تجاویز پر مشاورت کی جا رہی ہے۔ یاد رہے اس سے قبل حکومت نے عدالتی حکم پر اسموگ کیلئے ہفتہ اتوار اور سوموار کو 15 تک چھٹیاں اور دفاترز میں پچاس فیصد حاضری کے ساتھ کام کرنے کا نوٹیفکیشن جاری کیا تھا۔ لیکن سموگ میں اضافے کے باوجود سکولوں میں تاحال مکمل طور چھٹیاں نہیں کی جاسکیں۔دوسری طرف سندھ حکومت کی جانب سے موسم سرما کی تعطیلات کا اعلان کر دیا گیا ہے۔ بتایا گیا ہے کہ محکمہ تعلیم سندھ کی اسٹئرنگ کمیٹی کی ذیلی کمیٹی نے طے کیا ہے کہ صوبے بھر میں موسم سرما کی تعطیلات 20 دسمبر سے یکم جنوری تک ہوں گی۔