ملک میں بڑا آپریشن کرنے سے قبل تمام جماعتوں کو اعتماد میں لیں گے۔ بیرسٹر عقیل ملک

?️ 23 مئی 2025

اسلام آباد (سچ خبریں) وزیر مملکت برائے قانون و انصاف بیرسٹر عقیل ملک نے کہا ہے کہ ملک میں اگر کوئی بڑا آپریشن ہوتا ہے تو تمام جماعتوں کو اعتماد میں لیا جائےگا۔

تفصیلات کے مطابق بیرسٹر عقیل ملک نے کہا ہے کہ جنگ میں بھارت کو منہ کی کھانی پڑی، بھارت اپنی پراکسیز کے ذریعے دہشت گردی کررہا ہے، دہشت گردوں کےخلاف انٹیلی جنس بیسڈ آپریشن ہورہے ہیں۔ انہوں نے کہا کہ ملک میں اگر کوئی بڑا آپریشن ہوتا ہے تو تمام جماعتوں کو اعتماد میں لیا جائے گا، ملک میں بھارت ہندوتوا ایجنڈے کےتحت دہشت گردی پھیلا رہا ہے، کشمیر اور سندھ طاس پر پاکستان کی پوزیشن واضح ہے۔

ذرائع کے مطابق وزیر مملکت برائے قانون و انصاف کا کہنا تھا کہ پی ٹی آئی سیاسی جماعتوں سےبات کرنے میں دلچسپی نہیں رکھتی، بانی پی ٹی آئی اور ان کی جماعت خود اپنے موقف میں واضح نہیں، مقتدرہ کہہ چکی ہے کہ سیاسی معاملات میں ہمیں شامل نہ کیا جائے۔

بیرسٹر عقیل ملک نے کہا کہ بانی کو سیاسی جماعتوں کےساتھ ہی بات چیت کرنی پڑے گی، تحریک انصاف سپیکرآفس کو مذاکرات سے متعلق آگاہ کر دے، ملک استحکام کی طرف جارہا ہے، پی ٹی آئی خود دلدل میں پھنستی جارہی ہے۔ جس کے دل میں چورنہیں ہوتا وہ پولی گرافک ٹیسٹ کروا لیتا ہے، عمران خان پولی گرافک ٹیسٹ نہیں کرا رہے ہیں۔