مشکل فیصلوں میں سب کو اپنا حصہ ڈالنا پڑے گا:شاہد خاقان عباسی

?️ 16 مئی 2022

(سچ خبریں) سابق وزیراعظم اور مسلم لیگ ن کے سینئر ترین رہنما شاہد خاقان عباسی نے کہا کہ معاملات گہرے اور تشویشناک ہیں، مشکل فیصلوں میں سب کو اپنا حصہ ڈالنا پڑے گا۔

انہوں نے کراچی میں میڈیا سے گفتگو کرتے ہوئے کہا کہ موجودہ حکومت کی کوشش ہے معاملات پر قابو پایا جائے۔آج سیاسی مفادات کو پیچھے کرکے ملک کو اولین ترجیح دینا پڑے گی۔

انہوں نے کہا کہ عمران خان کی حکومت نے 4 سال میں خرابیاں پیدا کی ہیں۔سیاسی مفادات کو پیچھے ڈالنا پڑے گا۔انہوں نے کہا کہ جو حالات ہیں ان میں سیاست ثانوی حیثیت اختیار کر گئی، غلطیاں کسی اور کی ہیں ، معیشت کی حالت کو ملاحظہ کریں۔شاہد خاقان نے مزید کہا کہ قرض پر لیتے رہے اور ملک چلاتے رہے، ان معاملات پر قابو پانا آسان نہیں ہوتا، انشاءاللہ ملکی معیشت کو استحکام دیں گے۔

عوام کے لیے خوشخبری ہے کہ عمران خان سے جان چھوٹ گئی ہے۔ملک میں احتساب کے معاملات عوام کے سامنے آ چکے ہیں،اب حکومت کی ذمہ داری ہے کہ احتساب کے عمل کو بھی برقرار رکھے اور نیب بھی ختم کرے۔انہوں نے مزید کہا کہ ن لیگ میں مشاورت ہوئی کہ کس طرح ملکی معاملات حل کیے جائیں، ابھی تک تیل کی قیمتیں نہیں بڑھائی گئیں، کوشش ہے کہ عوام ہر کم سے کم دباؤ پڑے۔

ان کا کہنا تھا کہ خرابیاں اتنی ہیں کہ ان پر قابو پانا ممکن تو ہے لیکن مشکلات ہیں، جو بھی فیصلے ہوں گے ان کی بڑی سیاسی قیمت ادا کرنی پڑے گی۔دوسری جانب وزیراعظم شہباز شریف مخلوط حکومت میں شامل اتحادی جماعتوں کے راہنماﺅں سے آج ملاقاتیں کریں گے جن میں نوازشریف کی زیرصدارت لندن میں ہونے والے مسلم لیگ نون کے اجلاس کے فیصلوں پر اتحادیوں کو اعتماد میں لینے کے علاوہ فوری انتخابات اور نگراں حکومت کے معاملے پر مشاورت کریں گے اور حکومتی مستقبل کے حوالے سے تبادلہ خیال کیا جائے گا۔