مسلم لیگ کے ایک اہم سیاسی رہنما کو گرفتار کر لیا گیا

?️ 27 اپریل 2021

لاہور (سچ خبریں) مسلم لیگ ن کے رہنما جاوید لطیف کا گرفتار کر لیا گیا ہے انہوں نے گرفتاری سے قبل اپنے ایک بیان میں کہا ہے کہ خرابیوں کی نشاندہی کرنے والوں کو غدار کہا جاتا ہے۔ایک منتخب نمائندے کا فرض بنتا ہے کہ وہ ملک میں ہونے والی خرابیوں کی نشاندہی کرے۔

پولیس چوک مجھے گھیر کر عدالتی فیصلے کا انتظار کر رہی تھی۔۔وزیراعظم کے حکم پر اداروں میں بیٹھے لوگ یہ کارروائیاں کر رہے ہیں۔انہوں نے مزید کہا کہ عمران خان کون ہوتا ہے جہانگیر ترین کو انصاف دینے والا؟

۔خیال رہے کہ سیشن کورٹ میں لیگی رہنما جاوید لطیف کے خلاف ریاست مخالف کیس کی سماعت ہوئی جس میں سرکاری وکیل نے ان کی ضمانت خارج کرنے کی استدعا کی۔

سرکاری وکیل کا کہنا تھا کہ جاوید لطیف کا متنازع بیان اپنے لیڈرکی محبت میں حدود سے تجاوز کے مترادف ہے، ان کے بیان کی سی ڈی کو فرانزک کے لیے بھجوادیا گیا ہے۔ میڈیا رپورٹ کے مطابق سرکاری وکیل نے عدالت میں کہا کہ پراسیکیوشن کا کیس قانون کے تمام تقاضوں کے مطابق ہے، اس مرحلے پر جاوید لطیف کی ضمانت نہیں بنتی۔

جبکہ جاوید لطیف کے وکیل نے کہا کہ مریم نوازکو قتل کرنے کے لیے سازش تیار کی گئی اس سازش کے تناظر میں جاوید لطیف نے یہ بات کی، سی آئی اے لاہور کیس دیکھ رہی ہے یہاں کسی دہشتگردکی ضمانت نہیں لگی، پولیس کے پاس ان معاملات پر ایف آئی آردرج کروانے کا اختیارہی نہیں۔

عدالت نے وکلا کے دلائل سننے کے بعد فیصلہ محفوظ کیا جو کچھ دیر کے بعد ہی سنا دیا گیا تھا اور جاوید لطیف کی درخواست ضمانت خارج کر دی گئی۔ جاوید لطیف عدالتی فیصلہ سننے سے پہلے ہی عدالت سے چلے گئے تھے، عدالت نے جاوید لطیف کی عبوری ضمانت کی درخواست مسترد کی تو سی آئی اے نے مسلم لیگ ن کے رہنما جاوید لطیف کو سگیاں پُل سے گرفتار کر لیا۔