مر جائوں گا بانی پی ٹی آئی کو نہیں چھوڑوں گا، اسد قیصر

?️ 4 مئی 2025

صوابی: (سچ خبریں) رہنماء پی ٹی آئی اسد قیصر نے کہا ہے کہ چیف جسٹس عدلیہ کو تحفظ فراہم کریں، مر جائوں گا بانی پی ٹی آئی کو نہیں چھوڑوں گا، بانی پی ٹی آئی کو رہا، پیکا ایکٹ واپس لیا جائے،پانی تقسیم میں خیبرپختونخوا حصہ 18فیصد، 7فیصد کی فراہمی نا انصافی ہے۔

عوامی جرگے سے خطاب کرتے ہوئے اسد قیصر نے کہا کہ تربیلا ڈیم صوابی میں واقع ہے لیکن ہمیں تربیلہ سے بجلی نہیں مل رہی ہے،بلکہ بارہ ، بارہ گھنٹے تک لوڈ شیڈنگ کی جارہی ہے ، پانی کی تقسیم میں ہمارے صوبے کا حصہ 18فیصد ہے لیکن ہمیں 7فیصد دیا جارہا ہے، جو کہ سراسر ناانصافی ہے ۔

انہوں نے کہا کہ تمباکو ہماری نقدآور فصل ہے، لیکن کاشتکاروں کے مسائل حل نہیں ہورہے ہیں ،خواجہ آصف مجھے تمباکو مافیا کہہ رہا ہے،میرا تو تمباکو کا کوئی کاروبار نہیں ہے۔

انہوں نے کہا کہ اپنے لوگوں کی آواز اٹھانا میری ذمہ داری ہے،حکومت نے تمباکو پر ٹیکس لاگو کیا ہے، اس کے خلاف آواز بلند کریں گے ۔ انہوں نے کہا کہ ایک ہی ادارہ ہے جس کی طرف لوگ دیکھتے ہیں کہ وہ ہمیں انصاف دے گا،چیف جسٹس آف پاکستان کو چاہیے کہ وہ عدلیہ کو تحفظ دے،اسدقیصر نے واضح کیا کہ میں مرجائوں گا لیکن بانی پی ٹی آئی کو نہیں چھوڑوں گا۔

انہوں نے کہا کہ پانچ سال صوبائی اسمبلی کے اسپیکر اور چار سال قومی اسمبلی کے اسپیکر رہا،مجھے عہدوں کا کوئی لالچ نہیں ہے،ہم نے احتجاج کی کال دی ہے،ہمارا پہلا مطالبہ ملک کے سب سے بڑے لیڈر بانی پی ٹی آئی عمران خان سمیت تمام بے گناہ قیدیوں کی رہائی اور دوسرا مطالبہ آزاد عدلیہ ہے، ہمارا مطالبہ ہے کہ پیکا ایکٹ واپس لیا جائے ، یہ کالا قانون ہے ، انہوں نے کہا کہ اس وقت ملک میں عملاً کوئی قانون نہیں ہے ایسا دور تو ڈکٹیٹر مشرف کا بھی نہیں تھا ۔