عید کا چاند دیکھنے مرکزی رویت کمیٹی کا اجلاس اسلام آباد میں ہوگا

?️ 12 مئی 2021

اسلام آباد (سچ خبریں) مرکزی رویت ہلال کمیٹی کا اجلاس چیئرمین مولانا عبدالخبیر آزاد کی زیر صدارت ہوگا جبکہ زونل کمیٹیوں کے اجلاس صوبائی دارالحکومتوں میں ہوں گےچاند کی رویت کی شہادتیں ملنے یا نہ ملنے کے بعد عیدالفطر کے حوالے سے اعلان کیا جائے گا۔خیال رہے کہ ماہرین فلکیات کہہ چکے ہیں کہ آج چاند نظر آنے کا امکان نہ ہونے کے برابر ہے۔

واضح رہے کہ گزشتہ روز سعودی عرب سمیت کسی خلیجی ملک میں شوال کا چاند نظر نہیں آیا تھا جس کے باعث وہاں آج 30 واں روزہ ہے اور 13 مئی (بروز جمعرات) کو عیدالفطر منائی جائے گی۔اسی طرح بیشتر مغربی ممالک میں بھی جمعرات کو عیدالفطر ہوگی۔

یاد رہے کہ رویت ہلال کمیٹی اس بات کو یقینی بنانے کی کوشش میں مصروف ہے کہ رواں سال عیدالفطر پورے ملک میں ایک ساتھ منائی جا سکے اور اس مقصد کے لیے اراکین کمیٹی نے ان علما سے رجوع کرنا شروع کردیا ہے جنہوں نے ماضی میں شوال کے چاند دیکھنے سے متعلق اعلان کی عوامی مخالفت کی تھی۔

کمیٹی کے کچھ اراکین نے عید کی متوقع تاریخ کے بارے میں وزیر اطلاعات فواد چوہدری کے قبل از وقت اعلان پر بھی تشویش کا اظہار کیا تھا۔

رویت ہلال کمیٹی کے چیئرمین مولانا عبد الخبیر آزاد کے سامنے متعدد اراکین نے خدشات کا اظہار کیا کہ وزیر اطلاعات کے اس طرح کے بیانات سے پشاور کی قاسم خان مسجد کے مفتی پوپلزئی جیسے علما کی حوصلہ افزائی ہوگی کہ وہ رواں سال بھی کمیٹی کے اختیار کو خاطر میں نہیں لائیں گے۔