عثمان بزدار سے متعلق کہیں نہ کہیں غلط فہمیاں ہیں:فردوس عاشق

?️ 20 مئی 2021

لاہور (سچ خبریں)وزیراعلیٰ پنجاب کی معاون خصوصی ڈاکٹر فردوس عاشق اعوان کا کہنا ہے کہ عثمان بزدار سے متعلق کہیں نہ کہیں غلط فہمیاں ہیں وہ کسی کے خلاف انتقامی کارروائی نہیں کر رہے ہیں وہ وزیر اعظم کی قیادت میں اپنی مدت پوری کریں گے۔

فردوس عاشق اعوان نے اپنے ایک بیان میں کہا کہ جہانگیر ترین نے واضح طور پر کہا ہے کہ وہ تحریک انصاف کا حصہ ہیں اور اسے نقصان نہیں پہنچائیں گے۔معاون خصوصی نے کہا کہ تحریک انصاف میں ہر کوئی اپنی رائے کا آزادانہ اظہار کرسکتا ہے۔فردوس عاشق اعوان کا مزید کہنا تھا کہ عثمان بزدار وزیراعظم کی قیادت میں اپنی مدت پوری کریں گے۔

اس سے قبل وزیر اعظم کے حوالے سے ان کا کہنا تھا کہ پیار سے کوئی وزیراعظم کی جان تو لے سکتا ہے لیکن بلیک میلنگ کرکے ان کے سر کا بال بھی نہیں اڑا سکتا۔اپنے ایک بیان میں فردوس عاشق اعوان نے کہا کہ شاہی خاندان پنجاب کو بارہ سو ارب روپے کا مقروض چھوڑ کر رخصت ہو گیا۔

دوسری جانب وزیراعلیٰ پنجاب عثمان بزدار نے سرکاری ملازمین کی تنخواہوں میں فرق دور کرنے کے لئے اقدامات کیے ہیں۔وزیراعلیٰ پنجاب کی زیر صدارت تنخواہوں میں فرق دور کرنے کے لئےکمیٹی کا اجلاس ہوا جس میں کمیٹی نے وزیر اعلیٰ کو سفارشات اور تجاویز پیش کیں۔

عثمان بزدار نے کہا کہ مہنگائی کے تناسب سے تنخواہوں میں اضافہ ملازمین کی ضرورت ہے، سرکاری ملازمین کو ان کا حق ضرور دیں گے۔اجلاس میں محکموں کی غیر ضروری آسامیوں کو ختم کرنے پر غور کیا گیا۔وزیر اعلیٰ نے کہا کہ چھوٹے سرکاری ملازمین کے معاشی مسائل ترجیحی بنیادوں پر حل کریں گے۔