کراچی (سچ خبریں) تفصیلات کے مطابق اسلام آباد سے سعودی شہر ریاض کیلئے اڑان بھرنے والے پی آئی اے کے مسافر طیارے کو دوران پرواز ہنگامی صورتحال کا سامنا کرنا پڑ گیا۔ میڈیا رپورٹس کے مطابق اسلام آباد سے سعودی عرب کیلئے روانہ ہونے والے پی آئی اے طیارے کی سائیڈ اسکرین میں دوران پرواز دراڑ پڑ گئی جس کے بعد جہاز کے کپتان نے ہنگامی اقدام اٹھاتے ہوئے کراچی ائیرپورٹ کے کنٹرول ٹاور سے رابطہ کر کے ٹیکنیکل لینڈنگ کی اجازت طلب کی۔
اجازت ملنے کے بعد کپتان طیارے کو کراچی ائیرپورٹ پر بحفاظت ہنگامی لینڈنگ کروانے میں کامیاب رہا۔ میڈیا رپورٹس کے مطابق دوران پرواز اور ائیرپورٹ پر ہنگامی لینڈنگ کے دوران طیارے میں موجود کسی بھی شخص کو کسی قسم کا نقصان نہیں پہنچا۔
واضح رہے کہ ایک ہفتے کے دوران پی آئی اے پروازوں میں ہنگامی صورتحال کا یہ تیسرا واقعہ ہے۔ اس سے قبل اتوار کے روز سعودی عرب سے پاکستان آنے والے مسافروں کو پرواز میں فنی خرابی کے باعث شدید مشکلات کا سامنا کرنا پڑا۔
ذرائع کے مطابق سعودی شہر جدہ سے صوبہ پنجاب کے دارالحکومت لاہور آنے والی قومی ایئر لائن کی پرواز میں فنی خرابی پیش آگئی جس کے باعث طیارے کو ہنگامی لینڈنگ کرنا پڑی۔پی کے 9760 فنی خرابی پر کپتان نے کراچی ایئرپورٹ ٹاور سے رابطہ کیا۔کنٹرول ٹاور سے اجازت ملنے پر پرواز کی کراچی ایئر پورٹ پر ہنگامی لینڈنگ کی گئی۔ جبکہ اسی روز اسلام آباد سے کراچی آنے والی قومی ایئر لائن کی پرواز میں فنی خرابی پیدا ہوئی۔
پی آئی اے کی پرواز پی کے307 میں فنی خرابی رپورٹ ہوئی۔بتایا گیا کہ طیارہ ٹیک آف کرنے کے بعد 21 منٹ تک ہوا میں رہا۔فنی خرابی پیدا ہونے کی وجہ سے کپتان نے کنٹرول ٹاور سے رابطہ کیا۔کپتان نے بحفاظت طیارہ ائیر پورٹ پر اتارا۔قومی ایئرلائن کے ترجمان نے بتایا کہ طیارے کے ایک نیوی گیشن سسٹم میں فنی خرابی پیدا ہوئی۔کپتان نے حفاظتی اقدامات کے پیش نظر طیارے کو واپس اسلام آباد اتارا۔
