سعودی دارالحکومت پر میزائل حملے کی پاکستان کی مذمت

?️ 7 دسمبر 2021

اسلام آباد(سچ خبریں) سعودی دارالحکومت ریاض پر حوثیوں کی جانب سے میزائل حملے کی مذمت کرتے ہوئے کہا ہے کہ  پاکستان سلامتی اور تحفظ کے لئے سعودی عرب کی حمایت جاری رکھے گا۔ پیر کی رات کو دارالحکومت ریاض پر ایک بیلسٹک میزائل داغا گیا ہے، جسے سعودی عرب نے روک لیا۔

تفصیلات کے مطابق ترجمان دفتر خارجہ نے کہا ہے کہ پاکستان حوثی باغیوں کی جانب سے ریاض میں میزائل فائر کی مذمت کرتا ہے۔ترجمان نے کہا کہ پاکستان سلامتی اور تحفظ کے لیے سعودی عرب کی حمایت جاری رکھے گا۔

واضح رہے کہ گزشتہ روز سعودی حکومت کی جانب سے ایک بیان میں کہا گیا تھا کہ پیر کی رات کو دارالحکومت ریاض پر ایک بیلسٹک میزائل داغا گیا ہے، جسے سعودی عرب نے روک لیا، حکام کا کہنا تھا کہ یہ حملہ ریاض کے پڑوسی ملک یمن میں ایران کے حمایت یافتہ حوثی باغیوں کے ساتھ تنازعے کے درمیان کیا گیا ہے۔

یمن کے حوثی باغیوں کے خلاف سعودی عرب کے زیر قیادت فوجی اتحاد نے پیر کو کہا کہ وہ بین الاقوامی انسانی قانون کے دائرۂ کار میں رہتے ہوئے آہنی ہاتھوں کے ساتھ اس میزائل حملے کا جواب دے گا۔خیال رہے کہ یہ حملہ عین اُسی دن ہوا جب سعودی عرب کے ولی عہد محمد بن سلمان نے علاقائی دورے کا آغاز کیا تھا۔

ریاض پر حملے کی کوشش ایک ایسے وقت میں سامنے آئی ہے جب سعودی عرب کے زیر قیادت اتحاد نے یمن میں اپنی فضائی مہم میں تیزی لائی ہے، کیوں کہ حوثیوں نے چھ سالہ تنازعے میں یمنی حکومت کے آخری گڑھ پر قبضہ کرنے کی دھمکی دی ہے۔