ریاست ہرسال قیمتی جانوں اور املاک کے ضیاع کی متحمل نہیں ہوسکتی۔ فیلڈ مارشل عاصم منیر

?️ 14 ستمبر 2025

ملتان (سچ خبریں) فیلڈ مارشل سید عاصم منیر نے قصور سیکٹر اور جلال پور پیر والا، ملتان میں فلڈ ریلیف کیمپ کا دورہ کیا،سیلاب متاثرین سے ملاقات میں آبادکاری اور بحالی تک مکمل تعاون کی یقین دہانی کرادی۔

پاک فوج کےشعبہ تعلقات عامہ ( آئی ایس پی آر) کے مطابق فیلڈ مارشل سید عاصم منیر نے قصور سیکٹر اور جلال پورپیروالا، ملتان میں فلڈ ریلیف کیمپ کا دورہ کیا ہے، قصور اور ملتان پہنچنے پر فیلڈ مارشل کا کور کمانڈرز لاہور اور ملتان نے استقبال کیا۔

فیلڈ مارشل نے امدادی کارروائیوں میں مصروف اہلکاروں اور سیلاب متاثرین سے ملاقات کی، فیلڈ مارشل سید عاصم منیر نے جوانوں کے جذبے، تیاری اور دن رات محنت کو سراہا، متاثرین نے پاک فوج کی بروقت مدد پر تہہ دل سے شکریہ ادا کیا۔

اس موقع پر بات کرتے ہوئے فیلڈ مارشل عاصم منیر نے کہا ریاست ہر سال قیمتی جانوں اور املاک کے ضیاع کی متحمل نہیں ہوسکتی، اچھی طرزحکمرانی اور عوامی شراکت پر مبنی ترقی وقت کی ضرورت ہے، متاثرہ آبادی کو ہر سال جانی و مالی نقصان سے بچانے کیلئے بنیادی ڈھانچے کی تعمیر تیز کی جائے۔