اسلام آباد (سچ خبریں) وزیر اعظم عمران خان نے پنجگور اور نوشکی میں فوجی کیمپوں پر دہشت گردانہ حملہ ناکام بنانے والے سیکیورٹی جوانوں کو سلام پیش کرتے ہوئے کہا ہے کہ ہمارے بہادر جوان عوام کی حفاظت اور دفاع کے لیے بڑی قربانیاں دے رہے ہیں، دہشت گردوں کی جانب سے حملے کے بعد جوابی کاروائی میں چار دہشت گرد مارے گئے۔
تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر اپنے بیان میں کہا کہ پنجگور اورنوشکی میں دہشت گرد حملوں کو ناکام بنانے والے جوانوں کو سلام پیش کرتے ہیں، ہمارے بہادر جوان عوام کی حفاظت اور دفاع کے لیے بڑی قربانیاں دے رہے ہیں، پوری قوم سیکیورٹی فورسز کے ساتھ کھڑی ہے۔
خیال رہے کہ گذشتہ روز بلوچستان کے علاقے نوشکی اور پنجگور میں دہشت گردوں نے حملہ کردیا تھا ، فورسز کی جوابی کارروائی میں چار دہشت گرد مارے گئے تھے جبکہ فورسز کا ایک جوان زخمی ہوا۔ آئی ایس پی آر کا کہنا تھا کہ دہشت گردوں نے سیکیورٹی فورسز کے کیمپوں کو نشانہ بنایا، دہشت گردوں کو جوابی کارروائی میں بھاری نقصان اٹھانا پڑا۔دوسری جانب وزیر داخلہ شیخ رشید نے بھی پنجگور اور نوشکی میں سیکیورٹی فورسز پر دہشت گردانہ حملے کی مذمت کی ہے۔
