حکومت کا ملکی تاریخ میں پہلی بار ڈیجیٹل کرنسی متعارف کروانے کا فیصلہ

🗓️ 19 ستمبر 2023

اسلام آباد: (سچ خبریں) حکومت نے ملکی تاریخ میں پہلی بار ڈیجیٹل کرنسی متعارف کروانے کا فیصلہ کرلیا۔ جنگ کی رپورٹ کے مطابق حکومت نے مختلف قسم کی ادائیگیوں کیلئے ڈیجیٹل کرنسی متعارف کرانے کا فیصلہ کیا ہے، جس سے ملک میں کالے دھن کو روکنے، معیشت اور روپے کی قدر کو بہتر بنانے میں مدد ملے گی، اس مقصد کے تحت اسٹیٹ بینک آف پاکستان نے ڈیجیٹل کرنسی کی تیاری کیلئے کام شروع کردیا ہے، ڈیجیٹل کرنسی کی قدر پاکستانی روپے کے برابر ہوگی جس طرح چین کی ڈیجیٹل کرنسی کا ایک یونٹ چینی یوآن کے مساوی ہے۔

رپورٹ سے معلوم ہوا ہے کہ نئی ڈیجیٹل کرنسی کاغذی نوٹ کی طرح لیگل ٹینڈر یعنی حکومت کی ضمانت کی بنیاد پر جاری ہوگی، جس کو اسٹیٹ بینک کی مکمل حمایت حاصل ہوگی، اس کیلئے سینٹرل بینک ڈیجیٹل کرنسی (سی بی ڈی سی) کے نام سے ایک ادارہ کام کر رہا ہے جو اس کی لاگت اور دیگر عوامل کا جائزہ لے رہا ہے، پہلے مرحلے میں ڈیجیٹل کرنسی کا استعمال بتدریج بڑھاتے ہوئے کاغذ سے بنے نوٹوں کو کم کیا جائے گا اور آگے چل کر 90 فیصد ڈیجیٹل کرنسی کے استعمال کا منصوبہ ہے، جس کے نتیجے میں کاغذی نوٹوں کا استعمال صرف 10 فیصد تک محدود ہوجائے گا۔

مزید یہ بھی بتایا گیا ہے کہ ڈیجیٹل کرنسی کے ذریعے کی جانے والی ٹرانزیکشنز سے یہ بھی پتا چل سکے گا کہ رقم کہاں اور کس مقصد کیلئے استعمال ہوئی، اس طرح مانیٹری پالیسی بہتر اور مؤثر طریقے سے نافذ العمل عمل ہوسکے گی، اس مقصد کے تحت ہر قسم کی باریکی کو دیکھا جارہا ہے تاکہ ڈیجیٹل کرنسی شروع کرنے کے بعد کسی قسم کے مسائل پیدا نہ ہوں۔