حکومت نے پیٹرولیم کی مد میں عوام کی جیب پر 17 ارب روپے کا ڈاکا ڈالا، مفتاح اسماعیل

🗓️ 2 اپریل 2025

کراچی: (سچ خبریں) عوام پاکستان پارٹی کے سربراہ مفتاح اسماعیل کا کہنا ہے کہ حکومت نے پیٹرولیم کی مد میں عوام کی جیب پر 17 ارب روپے کا ڈاکا ڈالا، ہم اس حکومت سے امید ہی کرسکتے ہیں توقع نہیں کرسکتے ہیں،حکومت نے بجلی پر ریلیف دینے کا کہا تھا وہ ابھی تک نہیں ملا، کراچی میں عید ملن پارٹی سے خطاب کرتے ہوئے رہنماءعوام پاکستان پارٹی مفتاح اسماعیل نے حکومت پر پر پیٹرولیم مد میں17 ارب کے ڈاکے کا الزام لگا دیا۔

انہوں نے کہا کہ جو لوگ عوام کے ووٹ سے نہیں آئے وہ عوام کو ریلیف کیوں دیں گے۔ حکومت اپنے آپ کو مراعات دیتی رہتی ہے کچھ ہوش کے ناخن لے اور لوگوں کو بھی مراعات دے۔ وزراءنے اپنی تنخواہوں میں 186 فیصد اضافہ کیا ہے۔پنجاب اور ارکان قومی اسمبلی نے اپنی تنخواہیں میں 900 فیصد اضافہ کیا ہے۔

ان کاکہنا ہے کہ 17 ارب روپے ہم نے ٹیکس دیا ہے اور مزید دیتے رہیں گے۔

عوام کو بجلی اور گیس کے بلوں میں ریلیف دیا جائے۔حکومت آج ٹیکس لگانے کی بات کرتی ہے اور کل ریلیف دینے کی بات کرتی ہے۔ہماری اللہ سے دعا ہے کہ عام پاکستانی کی تنخواہوں میں بھی اضافہ ہو۔تقریب سے خطاب کرتے ہوئے رہنماءعوام پاکستان پارٹی مفتاح اسماعیل نے مزید کہا کہ وفاقی حکومت کینالز بنانے کے منصوبے کو موخر کردے۔متنازعہ منصوبے بنانے سے عوام کی کوئی خدمت نہیں ہوگی۔

ملک کی بد نصیبی ہے کہ پیپلز پارٹی سندھ میں 16سال سے حکومت کررہی ہے۔یہ حکومت عوام کو دیگر سہولیات نہیں دے سکتی اور نہ ہی ڈمپر سے لوگوں کو بچانے کیلئے کوئی اقدامات کئے جا رہے ہیں۔ان کا یہ بھی کہنا تھا کہ یہاں کراچی حیدر آباد کا موٹر وے نہیں ہے سپر ہائی وے کا نام موٹر وے رکھ دیا گیا۔ حیدر آباد سے سکھر موٹر وے نہیں اورانہوں نے پچھلے ہفتے لاہور سے بہاول نگر موٹر وے بنانے کا اعلان کردیا۔اچھی اور ذمے دار حکومت ہو تو ٹینکر اور ڈمپر کا مسئلہ 3 دن میں حل ہوسکتا ہے۔کراچی میں سینکڑوں افراد ٹینکر کی ٹکرسے مرگئے ہیں لیکن حکومت نے اس مسئلے کے حل کیلئے کوئی اقدامات نہیں کئے ہیں۔