حکومت ملکی معیشت مستحکم کرنے کیلئے ٹھوس اقدامات کر رہی ہے، وزیراعظم

?️ 21 فروری 2023

اسلام آباد:(سچ خبریں) وزیراعظم محمد شہباز شریف نے کہا ہے کہ حکومت ملکی معیشت کو مستحکم کرنے کے لیے ٹھوس اور فوری اقدامات کر رہی ہے۔

سرکاری خبر رساں ادارے ’اے پی پی‘ کے مطابق معروف عالمی مالیاتی فرم روتھ چائلڈ اینڈ کمپنی کے وفد سے گفتگو کرتے ہوئے وزیر اعظم نے کہا کہ موجودہ حکومت کو گزشتہ حکومت کی بدانتظامی کے مسائل کے علاوہ سیلاب جیسی قدرتی آفت کا مقابلہ کرنا پڑا ، غیر ضروری درآمدات میں کمی اور بر آمدات میں اضافہ حکومت کی اولین ترجیح ہے۔

وفد سے گفتگو کرتے ہوئے انہوں نے کہا کہ تمام مشکلات کے باوجود حکومت شبانہ روز محنت سے ملکی معیشت کی بہتری کے لیے کوشاں ہے۔

وزیراعظم نے کہا کہ حکومت پاکستان کی معیشت کو مستحکم کرنے کے لیے ٹھوس اور فوری اقدامات کر رہی ہے، غیرضروری درآمدات میں کمی اور بر آمدات میں اضافہ حکومت کی اولین ترجیح ہے۔

وفد نے مزید کہا کہ پاکستان اسٹاک ایکسچینج خطے کی بہتر کارکردگی کی حامل سٹاک ایکسچینجز میں سے ایک ہے، پاکستان نے حالیہ دنوں میں عالمی سطح پر مؤثر انداز میں موسمیاتی تبدیلی کے مضر اثرات کے بارے آگاہی پیدا کی ، پاکستان کی معیشت کے لیے موجودہ حکومت کے اقدامات اسے مثبت سمت کی طرف گامزن کر رہے ہیں۔

ملاقات میں وزیر مملکت برائے خزانہ عائشہ غوث پاشا اور متعلقہ اعلیٰ حکام نے بھی شرکت کی۔