حکومت متحرک اور جامع کیپٹل مارکیٹس کی تشکیل کے لئے پرعزم ہے، وزیر خزانہ سینیٹر محمد اورنگزیب

اجلاس میں کونسل کے اپنے ضوابطِ کار اور کیپٹل مارکیٹ کی ترقی کے مجموعی منصوبے اور حکمتِ عملی کا جائزہ لیا گیا اور مارکیٹ کو وسعت دینے، اسے مزید گہرا کرنے اور توسیع دینے کے لئے عالمی بہترین طریقوں اور منظم طریقہ ہائے کار کو اپنانے پر زور دیا گیا۔ اجلاس میں چار بنیادی شعبوں کو مضبوط بنانے پر بات ہوئی جن میں ریٹیل اور ادارہ جاتی سرمایہ کاروں کی شمولیت میں اضافہ، سرمایہ کاروں کی ضروریات کے مطابق متنوع سرمایہ کاری مصنوعات کی ترقی، بینکوں، بروکرز اور میوچل فنڈز سمیت اداروں کے لئے سہولت کاری میں بہتری اور سرمایہ کاروں اور اجراء کنندگان کے لئے مراعات کی تشکیل شامل ہے جن میں کراس بارڈر لسٹنگز، اشتراکِ عمل، اور وسیع تر مارکیٹ انضمام جیسے اقدامات بھی شامل ہیں۔
اجلاس میں کیپیٹل مارکیٹس کے کراس بارڈر انضمام کے تقاضوں، مارکیٹ ٹیکنالوجیز کے ان لائنمنٹ، ریگولیٹری جدیدکاری اور اجراء کنندگان کو قرض اور ایکویٹی دونوں مارکیٹس کے ذریعے سرمایہ بڑھانے کی ترغیب دینے کی ضرورت کا بھی جائزہ لیا گیا۔ شرکاء نے اس امر پر زور دیا کہ زیادہ لیکویڈیٹی، متحرک اور شفاف قیمتوں کے تعین کے نظام کی تشکیل قومی معاشی ترقی میں کیپٹل مارکیٹس کے کردار کو بڑھانے کے لئے ناگزیر ہے۔
وزیرِ خزانہ نے کہا کہ حکومت ایسے متحرک اور فعال کیپیٹل مارکیٹس کے قیام کے لئے پرعزم ہے جو اجراء کنندگان کو سرمایہ بڑھانے میں معاونت فراہم کر سکیں اور سرمایہ کاروں کو محفوظ اور پرکشش سرمایہ کاری کے مواقع مہیا کریں۔ انہوں نے کہا کہ جاری ڈھانچہ جاتی اصلاحات مارکیٹ کی کارکردگی مضبوط بنانے میں اہم کردار ادا کر رہی ہیں اور ضرورت اس بات کی ہے کہ حکومت اور نجی شعبہ دونوں قرض کیپیٹل مارکیٹ سے زیادہ سے زیادہ فائدہ اٹھائیں۔
وزیر خزانہ نے کونسل پر زور دیا کہ وہ نجی شعبے کی شمولیت میں حائل رکاوٹوں کی نشاندہی اور خاتمہ کرے۔ انہوں نے کہا کہ کیپٹل مارکیٹ کا مرکزی کردار ان اداروں کو جنہیں سرمایہ درکار ہے، ان افراد و اداروں سے جو بچت رکھتے ہیں، شفاف اور موثر ایکویٹی اور قرض کے آلات کے ذریعے جوڑنا ہے۔ اجلاس میں ریگولیٹری، ٹیکسیشن اور مراعاتی فریم ورکس کا بھی جائزہ لیا گیا، جن میں ریگولیٹری نگرانی میں بہتری، کمپنیوں کو لسٹنگ کی ترغیب دینے کے لئے مراعات، اور مصنوعات کی تیاری اور مارکیٹ کی مسابقت کے لئے ٹیکس پالیسیوں پر گفتگو شامل تھی۔
وزیر خزانہ نے کہا کہ ٹیکسیشن کیپیٹل مارکیٹ کی کشش پر اثر انداز ہونے والا ایک اہم عنصر ہے۔ انہوں نے ہدایت کی کہ ٹیکس پالیسی آفس، سٹیٹ بینک، ایس ای سی پی، ڈی ایم او اور وزارتِ خزانہ مشترکہ طور پر کیپیٹل مارکیٹ کے ٹیکس نظام، اجرا کنندگان کے لئے ٹیکس مراعات اور وسیع تر لسٹنگز اور زیادہ شفافیت کو فروغ دینے کے اقدامات کا جائزہ لیں۔ اجلاس میں اس بات پر زور دیا گیا کہ شفاف اور قواعد کی پابند کمپنیوں کو سراہا جائے۔
وزیر خزانہ یہ بھی ہدایت کی کہ کونسل کا سیکرٹریٹ حکومتِ پاکستان کی حال ہی میں اعلان کردہ تین مراحل پر مشتمل ڈیجیٹائزیشن پالیسی کو کیپٹل مارکیٹ ڈویلپمنٹ روڈمیپ کے ساتھ مربوط کرے۔ اجلاس میں یہ طے پایا کہ ترجیحی شعبوں میں خصوصی ورکنگ گروپس قائم کئے جائیں گے جو اگلے دو ہفتوں میں کلیدی کارکردگی اشاریے اور عملی منصوبے تشکیل دیں گے۔
کونسل کو سہ ماہی بنیادوں پر پیشرفت رپورٹ موصول ہو گی، اور عمل درآمد و نتائج کی نگرانی کے لئے ہر سہ ماہی میں کم از کم ایک اجلاس منعقد کیا جائے گا۔ اجلاس کو بتایا گیا کہ ان اقدامات کا مقصد ایک متحرک، لچکدار اور زیادہ لیکویڈیٹی رکھنے والا کیپیٹل مارکیٹ ایکو سسٹم قائم کرنا ہے، جو بچتوں کو پیداواری سرمایہ کاری کی طرف منتقل کرے، معاشی ترقی میں معاون ہو، اور پاکستان کی مجموعی مالی استحکام کو مضبوط بنائے۔