حکومت بلوچستان نے صوبے میں دفعہ 144 نافذ کردی۔

🗓️ 30 دسمبر 2024

کوئٹہ: (سچ خبریں) حکومت بلوچستان نے سرکاری ہسپتالوں کو پبلک پارٹنرشپ کے تحت چلانے کے اعلان کےخلاف گرینڈ ہیلتھ الائنس (جی ایچ اے) کے احتجاجی مظاہروں کے باعث مختلف قومی شاہراہیں بند کیے جانے کے پیش نظر صوبے بھر میں دفعہ 144 نافذ کردی۔

حکومت بلوچستان کے ترجمان شاہد رند نے بتایا کہ گزشتہ روز سے بلوچستان کی مختلف قومی شاہراہیں احتجاجاً بند ہیں، صوبے میں 3 مقامات پر احتجاج جاری ہے۔

ان کا کہنا تھاکہ وزیراعلیٰ بلوچستان سرفراز بگٹی نے پہلے دن ہی واضح کیا تھا کہ پرامن احتجاج سب کا حق ہے، صوبائی حکومت نے ہمیشہ جائز احتجاج کی اجازت دی لیکن قومی شاہراہیں کسی کو بند کرنےنہیں دیں گے۔

ترجمان حکومت بلوچستان نے کہا کہ احتجاج کی آڑ میں معصوم عوام کو تکلیف نہیں دیں۔

شاہد رند نے واضح کیاکہ گرینڈ ہیلتھ الائنس احتجاج سے متعلق ہائی کورٹ کے آرڈرز پر عمل درآمد کریں گے، صوبے کے سرکاری ہسپتالوں کی نجکاری نہیں کی جارہی ہے۔

دوسری جانب کوئٹہ میں گرینڈ ہیلتھ الائنس نے بلوچستان ہائی کورٹ کے قریب دھرنا ختم کرنے کا اعلان کردیا۔

چیئرمین ہیلتھ گرینڈ الائنس بہار شاہ کے مطابق بلوچستان ہائی کورٹ کی یقینی دہانی پر احتجاج ختم کررہے ہیں، عدالت نے ایک دن میں مطالبات پر عملدرآمد کی یقین دہانی کرائی ہے۔

ان کا کہنا تھا کہ مطالبات پر عملدرآمد نہ ہوا تو ہسپتالوں سے نکل کر استعفی دے دیں گے، سرکاری ہسپتالوں کو پبلک پارٹنرشپ کے تحت چلانے کے اعلان کےخلاف دھرناجاری تھا۔