بھارت سے تناؤ معیشت کیلئے سازگار نہیں، امید ہے آئی ایم ایف بورڈ 1.3 ارب ڈالر کی منظوری دے گا، وزیر خزانہ

🗓️ 27 اپریل 2025

واشنگٹن: (سچ خبریں) وفاقی وزیر خزانہ محمد اورنگزیب کا کہنا ہے کہ امید ہے پاکستان اس سال کے آخر تک پانڈا بانڈ کا اجرا کر دے گا، چین کی ڈومیسٹک بانڈ مارکیٹ میں پانڈا بانڈ کے اجرا میں پیشرفت ہوئی ہے۔

غیرملکی خبر رساں ادارے کو انٹرویو دیتے ہوئے انہوں نے کہا کہ پاکستان نے چین سے ایک اعشاریہ 4 ارب ڈالر یعنی 10 ارب یوان کی درخواست کی ہے، امید ہے آئی ایم ایف بورڈ مئی کے شروع میں 1.3 ارب ڈالر کی منظوری دے گا، 7 ارب ڈالر قرض پروگرام کے پہلے جائزے پر بھی دستخط کیلئے پر امید ہیں، پہلے جائزے کی منظوری کی صورت میں پاکستان کو ایک ارب ڈالر قسط ملے گی، تاہم بھارت کے ساتھ تناؤ کے اقتصادی اثرات سازگار نہیں ہوں گے۔

واشنگٹن میں پاکستانی سفارتخانے میں پاکستانی میڈیا سے گفتگو کرتے ہوئے وزیر خزانہ نے ملک میں جاری معاشی اصلاحات کو نافذ کرنے کے لیے حکومت کے عزم کا اعادہ کرتے ہوئے کہا کہ پاکستان کی معیشت اب درست سمت کے ساتھ پائیدار ترقی کی راہ پر گامزن ہے، حکومت معیشت اور اداروں کی بہتری کے لئے جاری اصلاحات کو نافذ کرنے کے لیے پر عزم ہے، وزیراعظم شہبازشریف کی قیادت میں حکومت کے دورر س اور دانشمندانہ اقدامات کی بدولت معیشت مضبوط ہوئی ہے۔

انہوں نے مثبت معاشی اشاروں کا ذکر کرتے ہوئے غیر ملکی ذخائر میں اضافے، مہنگائی میں کمی، بہتر کریڈٹ آؤٹ لک اور مالیاتی خسارے میں کمی کا حوالہ دیا، وزیر خزانہ نے پہلی بار زرعی آمدنی کو ٹیکس فریم ورک کے تحت شامل کرنے کا ذکر کیا اور اسے ایک قابل ذکر پیش رفت قرار دیا، محمد اورنگزیب نے کہا کہ موجودہ معاشی استحکام ملک کی پائیدار اقتصادی ترقی کی راہ ہموار کرے گا۔

قبل ازیں وزیرِ خزانہ و محصولات سینیٹر محمد اورنگزیب نے انٹرنیشنل مانیٹری فنڈ (آئی ایم ایف) میں ایک پینل مباحثے میں شرکت کی اور عالمی غیر یقینی صورتحال اور مختلف ممالک پر اس کے اثرات کے تناظر میں علاقائی تجارت کے فروغ کی اہمیت پر زور دیا، انہوں نے تمام اداروں میں آئی ٹی نظاموں کے انضمام کی ضرورت پر زور دیا، انہوں نے بتایا کہ پاکستان نے آئی ایم ایف کے ساتھ ایکسٹینڈڈ فنڈ فیسلٹی (ای ایف ایف) کے تحت پہلے جائزے اور ریزیلینس اینڈ سسٹین ایبلٹی فیسلٹی (آر ایس ایف) کے تحت نئے انتظام پر سٹاف لیول معاہدہ کرلیا ہے۔