بھارتی جارحیت عالمی سطح پر بے نقاب کرنے کیلئے سفارتی کمیٹی کا اجلاس

🗓️ 20 مئی 2025

کراچی (سچ خبریں) بھارت کی جارحیت اور پروپیگنڈے کو عالمی سطح پر بے نقاب کرنے کے لیے قائم کردہ اعلی ترین سفارتی کمیٹی کا مشاورتی اجلاس ہوا۔

تفصیلات کے مطابق بیرون ممالک میں بھارتی جارحیت اور سندھ طاس معاہدے سمیت کئی ظالمانہ اقدامات پر پاکستان کا درست موقف پیش کرنے کے حوالے اعلی سطح پر بنائی گئی کمیٹی کے پہلے مشاورتی اجلاس کا انعقاد ہوا۔

ذرائع کے مطابق اجلاس میں پیپلزپارٹی کے چیئرمین بلاول بھٹو زرداری، سینیٹر شیری رحمان حنا ربانی کھر شریک ہوئے جبکہ مسلم لیگ ن سے معاون خصوصی طارق فاطمی اور خرم دستگیر نے شرکت کی۔

ایم کیو ایم پاکستان کی نمائندگی سینیٹر فیصل سبزواری نے کی، ان کے علاوہ اجلاس میں جلیل عباس جیلانی، تہمینہ جنجوعہ نے بھی شرکت کی، سیکرٹری خارجہ نے شرکا کو تازہ ترین صورتحال پر بریفنگ دی اور بھارتی جارحیت سمیت فالز فلیگ آپریشن سے آگاہ کیا۔

اجلاس میں طے پایا کہ کمیٹی یورپ اور دیگر اہم ممالک کا دورہ کرے گی اور دنیا کو پاکستان کے موقف اور بھارتی جارحیت سے آگاہ کرے گی۔