بل گیٹس اور وزیر اعظم کا ٹیلفونک رابطہ،اہم امور پر تبادلہ خیال

🗓️ 6 اکتوبر 2021

اسلام آباد (سچ خبریں) وزیراعظم عمران خان اور بل اینڈ ملینڈا گیٹس فاؤنڈیشن کے شریک چیئرمین بل گیٹس کے درمیان  ٹیلیفونک رابطہ ہوا ہے جس میںاہم امور پر تبادلہ خیال کیا گیا  بل گیٹس نے  پولیو کیخلاف پاکستانی کاوشوں کو سراہا۔وزیر اعظم نے بھی کہا کہ پولیو کے خاتمہ کے لئے پرعزم ہیں۔

وزیراعظم میڈیا آفس کے جاری کردہ بیان کے مطابق وزیراعظم عمران خان نے بل گیٹس سے ٹیلیفون پر گفتگو کے دوران پاکستان کو فنانشل فاؤنڈیشن کی سروسز کی فراہمی پر بات چیت کی۔

دونوں شخصیات نے ملک میں پولیو کی تازہ ترین صورتحال اور پاکستان میں پولیو ویکسین کی تیاری کے حوالے سے تبادلہ خیال کیا۔ اس موقع پر وزیراعظم عمران خان نے پاکستان میں پولیو کی صورتحال سے آگاہ کیا اور پولیو کیسز میں تیزی سے کمی پر بھی آگاہ کیا۔

وزیراعظم عمران خان کا کہنا تھا کہ موجودہ حکومت پاکستان سے پولیو کے خاتمے کیلئے پرعزم ہے جس پر بل گیٹس نے کہا کہ فاؤنڈیشن پاکستان کو پولیو کے خاتمے کیلئے بھرپور تعاون جاری رکھے گی۔اس موقع پر دونوں رہنماؤں نے افغانستان کے نظام صحت پر بھی تبادلہ خیال کیا اورافغانستان میں پولیو کے خاتمے کیلئے مہم دوبارہ شروع کئے جانے پر غور و خوص کیا گیا۔

وزیراعظم نے کہا کہ افغانستان کی آدھی سے زائد آبادی غربت کی لکیر سےنیچے زندگی بسر کررہی ہے، افغان عوام کو فوری طور پر معاشی مدد کی ضرورت ہے، وزیراعظم نے بل گیٹس سے انسانی ہمدردی کی بنیادوں پر افغان عوام کی معاشی مدد کی درخواست کی۔

اپنی گفتگو میں بل گیٹس نے پاکستان بھر میں ویکسین پروگرام تسلسل سے جاری رکھنے پر مبارکباد پیش کی، وزیراعظم عمران خان اور بل گیٹس کے درمیان احساس پروگرام پر بھی بات چیت کی گئی، بل گیٹس نے پاکستان کے ساتھ مختلف شعبوں میں تعاون جاری رکھنے کا عزم کا اظہار کیا۔