آپریشن سندور میں بھارت کا سندور اجڑ گیا۔ وزیر دفاع

?️ 27 جون 2025

اسلام آباد (سچ خبریں) وزیر دفاع خواجہ آصف کا کہنا ہے کہ آپریشن سندور میں بھارت کا سندور اجڑ گیا، پاکستان نے بھارت کا جو علاج کرنا تھا وہ کردیا، بھارتی ہٹ دھرمی کے باعث شنگھائی تعاون تنظیم کا مشترکہ اعلامیہ جاری نہیں ہوسکا، بھارتی مؤقف کی کسی نے حمایت نہیں کی۔

تفصیلات کے مطابق وزیر دفاع خواجہ آصف نے پارلیمنٹ ہاؤس کے باہر میڈیا سے گفتگو کرتے ہوئے کہا کہ ایس سی او وزرائے دفاع اجلاس کا مشترکہ اعلامیہ نہیں آسکا، میری تقریر کے بعد بھارتی وفد نے بھی بات کرنے کیلئے وقت مانگا، بھارتی وزیر دفاع کی درخواست مسترد کردی گئی، آپریشن سندور میں بھارت کا سندور اجڑ گیا ہے، پاکستان نے بھارت کا جو علاج کرنا تھا وہ کردیا۔

ذرائع کے مطابق ان کا کہنا ہے کہ بھارت نے شنگھائی تعاون تنظیم کے اجلاس میں بھی ضد کی، بھارتی ہٹ دھرمی کے باعث مشترکہ اعلامیہ جاری نہیں ہوسکا، بھارت کیلئے یہ خود ہزیمت ہے، ان کے مؤقف کی کسی نے حمایت نہیں کی۔ وزیر دفاع نے کہا کہ پاک ایران معاملے پر ابھی رائے نہیں دے سکتا، یہ معاملہ ابھی پوری طرح حل نہیں ہوا ہے، جب ایران معاملے کی اصل صورتحال سامنے ہوگی تو بات کریں گے۔

خواجہ آصف کا کہنا ہے کہ پاک امریکا تعلقات بہت اچھے جارہے ہیں، تعلقات میں کوئی بگاڑ نہیں، ہمارے بھارت کے ساتھ اہم نوعیت کے معاملات چل رہے ہیں، یہی وجہ ہے کہ بھارت کے ساتھ ہمارے تعلقات میں بگاڑ ضرور ہے، بھارت سے معاملات ٹھیک ہونے تک تعلقات نارمل نہیں ہوں گے۔