اسلام آباد(سچ خبریں ) وفاقی وزیراطلاعات و نشریات فواد حسین چوہدری نے کہا ہے کہ افغانستان کو دیئے گئے 2 ہزار ارب ڈالرز زمین کھا گئی یا آسمان نگل گیا؟ افغان عوام غربت میں پس رہے ہیں اورکابل کے سیاستدان اور جرنیل ارب پتی ہیں. یہ بات سماجی رابطے کی ویب سائٹ ٹوئٹر پر وفاقی وزیر اطلاعات و نشریات چوہدری فواد حسین نے جاری کیئے گئے ایک بیان میں کہی ہے فواد چوہدری نے کہا ہے کہ آٹھویں صوبے پر طالبان کے قبضے کے بعد افغان اور امریکی عوام کو افغان حکمرانوں کے سامنے سوال رکھنا چاہیئے کہ آخر افغانستان کو دیئے جانے والے 2 ہزار ارب ڈالرز زمین کھا گئی یا آسمان نگل گیا؟.
انہوں نے کہا کہ اتنے پیسے لگنے کے بعد افغان فوج پتوں کی طرح کیوں بکھر رہی ہے؟وفاقی وزیر اطلاعات و نشریات نے کہا کہ افغان عوام غربت میں پس رہے ہیں لیکن افغانستان کے سیاستدان اور جرنیل ارب پتی ہیں انہوں نے کہا کہ افغان سیاستدانوں اور جرنیلوں کے بیرونِ ملک اربوں کے اثاثے ہیں انہوں نے کہا کہ کرپشن کس طرح قوموں کو غرق کر دیتی ہے افغانستان اس کی مثال ہے. فوادچوہدری نے کہا کہ افغان جنگ میں ہم نے 70ہزار جانوں کی قربانیاں دیں لیکن بدلے میں ہمیں کیا ملا، سب نے دیکھا۔
ہم دنیا کو بتا ہی نہیں سکے کہ یہ جنگ کیوں ہوئی اور ہم نے کیا قربانیاں دیں، دنیا میں آج بیانیہ کی جنگ لڑی جا رہی ہے، بیانیہ مضبوط ہوگا تو ہماری اہمیت ہوگی، وزیراعظم عمران خان ہمیشہ میڈیا پر توجہ دینے اور بیانیہ کو مضبوط بنانے پر زور دیتے رہے ہیں.