اسرائیل کی جارحیت کیخلاف پاکستان کی حمایت کبھی فراموش نہیں کریں گے، ایرانی سفیر

?️ 26 جون 2025

اسلام آباد: (سچ خبریں) پاکستان میں ایران کے سفیر رضا امیری مقدم کا کہنا ہے کہ صیہونی حکومت نے ایران پر ایک ناحق اور جارحانہ جنگ مسلط کی، ایرانی قوم پاکستان کی حمایت کبھی فراموش نہیں کرے گی۔

اس حوالے سے اپنے ایک بیان میں رضا امیری مقدم نے کہا کہ عظیم ایرانی قوم ایک باوقار اور فیصلہ کن فتح کا جشن منا رہی ہے، یہ تاریخی فتح امت مسلمہ کیلئے فخر، حوصلے اور سچ کی جیت ہے، پاکستان نے ہمارے شانہ بشانہ کھڑے ہو کر یکجہتی کا مظاہرہ کیا، اصولی اور جرات مندانہ مؤقف پر صدر پاکستان، وزیراعظم اور فیلڈ مارشل کا شکریہ ادا کرتے ہیں، ایران اور پاکستان نے ہمیشہ یکجہتی اور بھائی چارے کا مظاہرہ کیا، ایرانی قوم پاکستان کی حمایت کو کبھی فراموش نہیں کرے گی۔

دوسری طرف وزیراعظم شہباز شریف سے ایرانی سفیر نے اہم ملاقات کی جس میں خطے میں امن و استحکام اور جغرافیائی صورتحال پر تبادلہ خیال ہوا، ایران میں پاکستان میں متعین سفیر رضا امیر مقدم وزیراعظم ہاؤس پہنچے تو ان کا پرتپاک خیر مقدم کیا گیا، دونوں رہنماؤں کے درمیان وزیراعظم ہاؤس میں ہونے والی ملاقات میں ایران اور اسرائیل کے درمیان کشیدگی، خطے میں امن و استحکام، اور تازہ جغرافیائی و سیاسی صورتحال پر تفصیلی تبادلہ خیال کیا گیا، اس موقع پر ایرانی سفیر نے ایران اسرائیل امریکہ تنازع پر وزیراعظم کو بریفنگ دی اور ایران کے مؤقف سے آگاہ کیا جب کہ وزیراعظم نے پاکستان کے امن و استحکام اور سفارتی حل کے اصولی مؤقف کو دوہرایا۔