اسرائیل کو کبھی تسلیم نہیں کریں گے:چیئرمین سینیٹ

🗓️ 2 اگست 2021

اسلام آباد(سچ خبریں)پاکستانی چیئرمین سینیٹ نے عرب پارلیمنٹ کے اسپیکرکے ساتھ ملاقات میں انہیں یقین دلایا کہ اسلام آباد صہیونی حکومت کو کبھی تسلیم نہیں کرے گا۔چیئرمین نے زور دیا کہ اسلام آباد فلسطینی عوام کے حقوق اور فلسطین کی آزادی کا محافظ ہے لہذا غاصب صہیونی حکومت کو کبھی تسلیم نہیں کرے گا۔

تفصیلات کے مطابق پیر کو اسلام آباد میں محمد صادق سنجرانی نے عرب پارلیمنٹ کے اسپیکر عادل العسومی اور ان کے ہمراہ وفد سے ملاقات کی اور مشرق وسطیٰ کی پیش رفت، مسئلہ فلسطین کے دفاع،  کشمیر کے تنازعہ اور عرب ممالک کے ساتھ تعلقات پر پاکستانی حکومت اور پارلیمنٹ کے موقف کی وضاحت کی۔

انہوں نے کہا کہ پاکستان کی خارجہ پالیسی خطے میں معاشی اور سماجی ترقی کے لیے رابطے اور شراکت داری پر مبنی ہے اور سب کے لیے امن کے پیغام کی عکاسی کرتی ہے۔سنجرانی نے زور دے کر کہا: ہم فلسطینیوں کے جائز مطالبات ، یعنی مقبوضہ علاقوں کی آزادی اور ایک آزاد ریاست کے قیام کی حمایت کرتے ہیں  اور ہم مظلوم فلسطینی عوام کے حقوق کا دفاع کرتے ہیں۔

انہوں نے مزید کہا کہ پاکستان اسرائیلی حکومت کو کسی قیمت پر تسلیم نہیں کرتا اور کشمیر کے مسلم عوام کی طرح ہم فلسطینی عوام کے ساتھ کھڑے ہیں۔ پاکستانی سینیٹ کے چیئرمین نے فلسطین اور کشمیر کے مسائل کو اقوام متحدہ کی سلامتی کونسل کی قراردادوں کے مطابق پرامن طریقے سے حل کرنے پر بھی زور دیا۔عرب پارلیمنٹ کے اسپیکر پانچ روزہ دورے کے لیے پاکستانی سینیٹ کے چیئرمین کی دعوت پر گزشتہ روز دارالحکومت اسلام آباد پہنچے۔