اسد قیصر نےپارلیمنٹ کا مشترکہ اجلاس دوبارہ جلد بلانے کا عندیہ دے دیا

?️ 11 نومبر 2021

اسلام آباد (سچ خبریں) اسپیکر قومی اسمبلی اسد قیصر نے پارلیمنٹ کا مشترکہ اجلاس دوبارہ بلانے کا عندیہ دیتے ہوئے کہا ہے کہ پارلیمنٹ کا مشترکہ اجلاس دوبارہ جلد بلایا جائے گا۔ وزیراعظم عمران خان کی ہدایت پر اپوزیشن سے رابطہ کروں گا اپوزیشن ملک کی بہتری کے لیے کی جانے والی اصلاحات میں حکومت کا ساتھ دے گی۔

تفصیلات کے مطابق ہم نیوز کے مطابق اسد قیصر نے کہا کہ وزیراعظم سے ہونے والی ملاقات میں مشترکہ اجلاس سے متعلق اہم امور پر تفصیلی گفتگو ہوئی۔انہوں نے کہا کہ وزیراعظم کی ہدایت پر اپوزیشن سے رابطہ کروں گا جس میں انتخابی اصلاحات سمیت دیگر بلز کو مشترکہ اجلاس میں پیش کرنے کے معاملے پر گفت و شنید ہوگی۔

انہوں نے واضح کیا کہ اپوزیشن سے رابطے کا بنیادی مقصد قومی مفاد کے حامل معاملات میں اتفاق رائے پیدا کرنا ہے۔انہوں نے دعویٰ کیا کہ حکومت قانون سازی کے عمل میں تمام جماعتوں کو ساتھ لے کر چلے گی۔

اسد قیصر نے کہا کہ اپوزیشن ملک کی بہتری کے لیے کی جانے والی اصلاحات میں حکومت کا ساتھ دے گی۔دوسری جانب سپیکر قومی اسمبلی اسد قیصر اور اپوزیشن میں ایک مرتبہ پھر درپردہ رابطوں سے فضا بہتر ہونے کا امکان پیدا ہوگیا ۔ ذرائع کے مطابق حکومت اور اپوزیشن کے درمیان درپردہ رابطے ہیں ،قانون سازی کے لئے بلایا جانے والا اجلاس موخر کردیا گیا ۔

ذرائع کے مطابق اجلاس ملتوی ہونے کا تاحال قومی اسمبلی سیکرٹریٹ کو حکم نامہ موصول نہ ہوا ، حکومت یکطرفہ قانون سازی نہ کرے تو اپوزیشن تعاون کے لیے تیار ہے، مشترکہ اجلاس موخر کرنے میں اتحادی جماعتوں کے تحفظات بھی شامل ہیں ۔ ذرائع کے مطابق مسلم لیگ ق، ایم کیو ایم اور جی ڈی اے کو بھی الیکٹرانک ووٹنگ مشین کے معاملے پر تحفظات ہیں۔

واضح رہے کہ پاکستان مسلم لیگ ن کی نائب صدر مریم نواز کا پارلیمنٹ کے مشترکہ اجلاس ملتوی ہونے سماجی رابطے کی ویب سائٹ ٹویٹر پر ردعمل دیتے ہوئے کہا ہے کہ ابھی ابھی ریجیکٹڈ خان صاحب تقریر جھاڑ رہے تھے کہ اراکین مشترکہ اجلاس میں جہاد سمجھ کر ووٹ کریں۔تو کیا قوم یہ پوچھ سکتی ہے کہ جہاد اچانک ملتوی کیوں کرنا پڑا ویسے تو قوم سب جانتی ہے مگر پھر بھی پوچھنا تو بنتا ہے۔