صیہونیوں کا اپنے جاسوس کی لاش واپس لینے کے لیے شام سے خفیہ رابطہ

سچ خبریں:صہیونی انٹیلیجنس اہلکار نے شام کے ساتھ جاری رابطوں کا انکشاف کیا ہے جن کا مقصد مشہور اسرائیلی جاسوس ایلی کوہن کی باقیات کی واپسی ہے، اس سے قبل بھی موساد نے شام سے ایک فوجی کی لاش واپس لانے کا دعویٰ کیا تھا۔

المیادین نیوز چینل کی رپورٹ کے مطابق اسرائیلی خفیہ ادارے کے ایک اعلیٰ اہلکار نے انکشاف کیا ہے کہ شام اور تل آویو کے درمیان معروف اسرائیلی جاسوس ایلی کوہن کی لاش کی واپسی کے حوالے سے رابطے جاری ہیں۔

یہ بھی پڑھیں:الجولانی کی صہیونی ریاست سے تعلقات بہتر بنانے کی پیشکش 

ایلی کوہن، جو 1960 کی دہائی میں اسرائیل کا اہم جاسوس تھا، دمشق میں کئی اعلیٰ سطوح تک رسائی حاصل کر چکا تھا۔ تاہم 1965 میں اس کی شناخت ظاہر ہونے پر شامی حکومت نے اسے پھانسی دے دی۔

اسرائیلی انٹیلیجنس افسر کے مطابق جیسے تزوی فلدمن کی لاش کی واپسی میں شامی حکام کی براہ راست مداخلت کلیدی ثابت ہوئی، ویسا ہی کردار ایلی کوہن کی باقیات کی واپسی میں درکار ہے۔

اسرائیلی وزیر اعظم بنیامین نیتن یاہو پہلے ہی شام سے ایک اور اسرائیلی فوجی، تزوی فلدمن، کی لاش کی واپسی کا اعلان کر چکے ہیں۔

یہ فوجی 1982 کی تل السلطان کی جنگ میں مارا گیا تھا۔

اس حوالے سے موساد اور اسرائیلی فوج نے ایک مشترکہ بیان میں کہا کہ ہم نے ایک پیچیدہ اور خفیہ آپریشن کے تحت فلدمن کی لاش کو شام کے قلب سے واپس لایا،اس کارروائی میں انتہائی حساس انٹیلیجنس معلومات استعمال کی گئیں۔

مزید پڑھیں: الجولانی کا تل ابیب کے لیے قیمتی تحفہ

ایلی کوہن اسرائیلی معاشرے میں ایک قومی ہیرو کی حیثیت رکھتا ہے، اس کی باقیات کی واپسی تل آویو کے لیے ایک بڑی علامتی کامیابی ہو سکتی ہے، جو موساد کی ماضی کی کارروائیوں اور اس کی یادگار حیثیت کو اجاگر کرے گی۔